Ang reaksiyon ni BJ

Kun si Budoy nalipay, si BJ naguol, naglagot, nasilag, ug nagmahay. Gumikan niining maong pagbatia, malisud alang kaniya nga kang Budoy makighugoy-hugoy. Si Budoy nahimong hulga alang kaniya ug nahimong babag aron makuha niya ang atensyon. Kun kaniadto nahimo siyang sentro sa pagtagad sa mga Mañego karon si Budoy na.

Ingon ini usab ang kamatuoran kalabot sa atong kinabuhi. Daghan kanato ang nahimong mga “buta” sa kamatuoran nga lisud dawaton. Daghan kanato ang nagpakaaron-ingnon gihapon aron atong matabonan ang kamatuoran mahitungod sa atong kaugalingon. Kini ang nahitabo ni BJ. Wala siya makadawat sa kamatuoran. Hinuon, dili pud ikabasol kay naanad naman siya sa maong han-ay sa pagkinabuhi. Apan diha lamang sa pagdawat sa kamatuoran ug sa pagbuka sa atong mga mata, atong makita nga duna pay mas nindot pa diay nga ikahatag ang kalibutan kun mahigugma lamang kita sa kamatuoran.