Bonifacio Day

Tatlong araw na lang at gugunitain

Ng bansa ang Araw ng Magigiting;

Ang Nobyembre 30 kapag dumarating

Tinatawag natin itong Bonifacio Day!

Si Gat. Bonifacio tunay na matapang

Siya ang nagtatag nitong Katipunan;

Ito’y ay binuo ng anak ng bayan

Na hindi nasindak sa mga kalaban!

Ang kaaway noon ay mga Kastila –

Nang tayo’y sakupin ang bansa’y kinawawa;

Mamamayan nating mayaman at dukha

Maraming inapi – maraming nadusta!

Dahil sa nakitang kasamaan noon –

Si Gat Bonifacio nangunang nagbangon

Di niya ininda ang putok ng kanyon;

At marami silang sa baya’y nagtanggol!

Ang tatlong K.K.K, ang naging sagisag

Na sa buong bansa’y kumalat kaagad;

Ang Pinaglabanan at ang Balintawak –

Naging mga saksi sa dugong dumanak!

Kung sa ngayon sana’y may taong ganito

Itong ating bansa ay hindi magulo;

Ang buhay na angkin, ang diwa at puso

Ay handog sa baya’t lahing Pilipino!

Kaya mayro’n pa bang Bonifacio ngayon

Na sa kaapihan ay handang magbangon?

May bayani pa bang sa habang panahon

Hindi magmamaliw sa magandang misyon?

Kung mabubuhay lang ikaw Bonifacio

Iyong aayusin kaguluhan dito

Mga mamamayan sa lahat ng dako

Tatahimik sila dahil sa giting mo!

Ang naging kalasag ay itak at diwa

At pati ang puso ay nakipagdigma;

Ikaw Bonifacio ay buo ang nasa –

Itong ating bayan ay maging malaya!