Trabaho lang!

Gikahinangop sa mga tagdumala sa duha ka tabloids dinhi sa Sugbo ang hukom sa fiskaliya nga nagbasura sa mga kaso nga gipasaka sa Cebu City Anti-Indecency Board (CAIB) kabahin sa giingong pagpublikar og law-ay nga sugilanon.

Gisuportahan sa fiskaliya ang argumento sa abogado sa Banat News nga ang gipublikar kaniadto nga mga sugilanon sa Sanciangko’s Wildflower nga gikagubtan sa daghang magbabasa, wala gayud makalapas sa balaud.

Apan hinoon, bisan og gibarugan sa tagdumala sa Banat News nga ang maong publikasyon wala makalapas sa lagda sa balaud, apan naminaw kini sa tambag sa CAIB mao nga gihimoan pa g’yud og kausaban ang paghimo nila’g sugilanon.

Kini maoy rason nga kun basahon ninyo ang Wild Orchids nga maoy gipuli sa Sanciangko’s Wildflower, mabantayan ninyo nga may kausaban na g’yud. Ang tigsulat sa Wild Orchids nga si Cindy Jones ug si Dra. Lucelle Mercado nga maoy pangulo sa CAIB suod kaayong managhigala.

Apan bisan pa niini wala magpanuko si Doktora Mercado pagpasaka og kaso batok ni Cindy, apan ang pagpasaka’g kaso wala gayud makausab sa ilang paghigalaay. Kini maoy panag-ingnon nga “Trabaho lang ug walay personalan.”

 Sama ra gud nako, makabantay mo nga ako man nga latoson og mga pagsaway ang mga opisyal ug kawani sa kagamhanan nga makahimo’g kalapasan sa balaud, apan sa gihapon ako silang mga higala. Unsaon nga mao may akong trabaho nga isip maglilindog sa mantalaan, sawayon nato kun dunay makahimo og dili maayo, ma-amigo man o dili. Sama nga sa akong pagka law enforcer sa Land Transportation Office (LTO) hasta ang akong silingan akong gidakop. Dili tingali mo makatoo niini apan wala ko mamakak.

* * *

 Ang kawani sa City Hall budget office nga maoy nagtipig sa duha ka suwat nga gikan sa Department of Budget and Management (DBM) nga alang unta sa City Council, angay tingali nga silotan.

Kun ang maong suwat makita niya nga alang kini sa City Council nganong wala man niya ipahatud? Nganong iya man nga gitipigan?

Si Budget Officer Nelfa Briones mao mismo ang mibutyag niini kanako nga ang usa niya ka sakop maoy nasipyat kay iya ra nga gitipigan ang maong suwat nga gikan sa DBM.

Tungod sa iyang gihimo, giayo-ayo’g saway sa mga konsehal si Mayor Michael Rama kay nagtoo sila nga si Rama maoy nagtipig sa suwat, apan dili diay. Dili ba husto ko nga angay’ng silotan ang maong kawani? Ang suwat sa DBM nagpahibalo sa mga sakop sa City Council nga ang dakbayan sa Sugbo kaniadtong miaging tuig migasto og kapin sa usa ka bilyon ka pesos nga sweldo ug ubang benepisyo sa mga kawani nga subra og P192 milyones sa gitugot sa balaud.

* * *

Paita uy, hangtud karon ang atong kapolisan ug ubang mga law enforcement units wala pa gayud makadakop ni Ruben Ecleo nga nag-atubang na og duha ka warrant of arrest.

Dunay mga paagi uy kun unsaon pagpangita ni Ecleo, apan dili lang nako ikatug-an dinhi. Ikaduha makaingon unya ang mga polis nga nagpatuga-tuga ko. Hatagan nako sila og ideya, sigurado g’yud nga si Ecleo dunay cellphone.

Anha diha pagsugod sa inyong pagpangita kaniya. Porbida, gamita g’yud nang inyong utok aron madakpan na si Ruben!