Nagpatuyang pangayo'g amutan

BRGY IBO, LAPULAPU CITY

“Hangyo lang unta mi sa among mga opisyal sa barangay nga butangan og suga diha atbang gyod sa barangay hall ug eskina Commonwealth kay pwerte gyu’ng ngitngita kuyaw sa disgrasya sa mga sakyanan ug mga tawo, wa man gyud ni nila atimana?”

BRGY ADLAON, CEBU CITY

“Ipasusi sa taga DepEd diri sa among lugar Sir kay ang mga maestra nagpatuyang naman lang og pangayog amutan para sa mga bata, hapit naman lang kada subject naay bayranan dagko ra ba kaayo mura naman og ang mga bata ang gipagasto tanan.”

BRGY MAMBALING, CEBU CITY

“Maayo unta’g tabangan mi nimo Sir nga mahangyo ang mga tanod sa among barangay nga badlungon ang manindahay diha tapad sa Bionic kay nakahasol man namong mangagi kay gawas sa gibaligyang sud-an, nagpainom man sab na sila.”

BRGY MACTAN, LAPULAPU CITY

“Diri sa among lugar Sir nagpadayon man gihapon ang pamaligya’g shabu ambot wa may gihimo ang mga polis diri pagsumpo ani nga illegal nga kalihukan, palihog mi Sir nga mapaabot ni sa laing unit sa kapolisan arun masumpo ni sila.”

BRGY BASAK-SAN NICOLAS, CEBU CITY

“Palihog mig pahibawo sa mga polis ug sa amo kapitan diri bahin aning rampant na kaayo nga booking sa 3 digit lotto nga illegal kay migamit man sila’g kaugalingon nga machine diri sa Cabreros ug Alumnos.”

BRGY OBONG, DALAGUETE, CEBU

“Salamat kaayo sir Jun nga naaksyonan na gyod sa mga polis ang mga namaligya’g shabu diri sa among lugar pulos na gyod nadakpan ang mga tawo nga responsabli sa pagmaligya og illegal nga drugas.”

BRGY QUIOT, CEBU CITY

“Hangtod karon pabiling wa masumpo ang sugal nga hantak, suyop sa marijuana ug ang kinawatay diri dapit sa UBCA3 sir Jun wa man gyod ni matagad sa among mga opisyal sa barangay ug sa mga tanod.”

BRGY LOOC, MANDAUE CITY

“Concern lang ko sir Jun diri sa may LTO Mandaue kay hapit na usa ka buwan nga wa gyod kuhaa ang mga nagpundok nga basura diri, ang amo gikuyawan kay naa ra bay mga lamok kuyaw masakit ang mga bata nga nagpuyo diri.”

BRGY CALUMBOYAN, SOGOD, CEBU

“Naproblema mi aning internetan diri sa among lugar Sir kay tagdugay man manira maabtan usahay og kaadlawon amo mga anak, lisod namo mapugngan kay kun dili namo hatagan og kuwarta ang amo anak pautangon ra man sad sa taga internetan.”

BRGY MAGUIKAY, MANDAUE CITY

“Luoy kaayo ming mga job order employees diri sa barangay Sir kay tagdugay man intawon madawat ang among sweldo, naunsa naman ning among pangagamhanan sa siyudad nga napasagdan naman lang mi.”

BRGY GINABLAN, BADIAN, CEBU

“Naa pa man gihapoy namaligya’g shabu diri sa among barangay Sir apil na sa brgy. Malabago, mamalihog mi nimo Sir nga maaksyonan ni sa ahensya sa gobiyerno nga tinud-anay nga mosumpo aning illegal nga drugas.”

BRGY TABOK, MANDAUE CITY

“Palihog mi sa among mga opisyal sa barangay sir Jun nga ipabadlong intawon nang naninda sa dalan kay hapit naman na sila magpatunga maglisod na intawon og agi nang mga sakyanan.”

* * *

Alang sa inyong mga reklamo text lang sa 09071678643