Nahalin na ang lapyahan

Kaniadto ang nagpuyo dinhi ang mga agukoy lamang nga nanggukod ni Mandaue City Councilor Editha Cabahug. Kini matud pa sa duwende nga mihunghong nako. Kaniadto baybayon kini nga giharian sa mga anaa magpuyo sa dagat. Hangtod karon baybayon gihapon kini tungod kay inig taub sa dagat moabot man gihapon kini sa iyang lapyahan. Ang nakalahi lang niini karon kay ang nahisgutang baybayon aduna nay kuryente ug tubig. Sa pinulongan pa sa mga bag-ong tubo "laysho" na ang maong baybayon kay aduna naman kini kuryente ug tubig. Kay naa nay kuryente ug tubig, ang baybayon ug ang lapyahan gibaligya na. Ang akong buot ipasabot dinhi mao ang 6.5 ka ektarya nga baybayon nga nahimutang sa Paknaan, Mandaue nga gihulagway sa uban nga Balili property sa dakbayan sa Mandaue tungod kay ila kining gianggid sa kontrobersiyal nga luna nga gipanag-iya sa mga Balili nga gipalit sa kagamhanan sa lalawigan sa Sugbo og halos usa ka gatos ka milyon ka pesos pero ang sobra sa katunga sa yuta anaa ilawom sa dagat.

Ang 6.5 ka ektarya nga baybayon sa Paknaan gihimong Socialized Housing Site sa kagamhanan sa dakbayan sa Mandaue aron maoy mapuy-an sa mga informal settlers sa Butuanon ug Mahiga Creek. Tungod sa iyang gidak-on, ubay-ubay gayod nga mga informal settlers sa Mandaue ang makapuyo niini. Maayo kining balita sa mga informal settlers tungod kay sa katapusan aduna na gayod silay mapuy-an nga luwas sa hulga sa dimolesyon. Ang nakaapan lang niini kay dili libre tungod kay gikinahanglan silang mobayad sa luna. Ubos sa Community Home Mortgage Program,10 porsyento sa bayranan sa mga settlers ang bayaran sa kagamhanan sa dakbayan sa Mandaue ug ang National Housing Authority na ang mobayad sa nahabiling bayranan. Ubos sa kasabutan ang mga informal settlers o beneficiaries mao na ang modata-data sa ilang bayranan sa National Housing Authority ug ang kagamhanan sa Mandaue ang guarantor. Maayo gihapon kini ngadto sa mga settlers pero aduna lay apan.

Sa ako nang giingon sa unahan, baybayon ug lapyahan kining dapita nga gihimong Socialized Housing Site. Sigun sa atong balaud ang mga foreshore lands dili puweding mapanag-iya ni bisan kinsa. Ang Charter sa dakbayan sa Mandaue (RA 5519) nag-ingon nga ang mga coastal timber, foreshorelands ug mga bakhawan sa dakbayan sa Mandaue iya sa kagamhanan busa kun atong tinambanon sa pagsabot ang nahisgotang baybayon ug lapyahan iya sa kagamhanan sa dakbayan.

Kun tinood nga motabang ang kagamhanan ni Mayor Jonas Cortes ngadto sa mga informal settlers sa iyang dakbayan nga iya pa man kining pabayron? Pero ibutang ta nga pabayron ang mga beneficiaries tungod kay wala naman kunoy libre karong panahona, kun makaimpas na sa ilang bayranan ang beneficiaries sa mga luna nga gitukoran sa ilang mga panimalay ma-isyuhan kaha ni sila og titulo nga dili man puweding matitulohan ang yuta? Kun akoy beneficiaries magpanuko ko sa pagkuha og luna ning dapita tungod kay dili gihapon ko mahiluna sa akong pagpuyo. Gawas nga walay drainage ug matauban gihapon ang maong dapit dili pa ko makaseguro nga makakuha og titulo sa yuta nga gitukoran sa akong balay busa mga beneficiaries PAGBANTAY. Mahalin na diay ron ang baybayon ug lapyahan? Ang tubag mahalin na sa dakbayan sa Mandaue.