Mao ni ang sagad mahitabo sa ubang nasud, nga sa higayon nga ang usa ka political leader, ma-cabinet secretary o ma-head of state, mahilambigit og mga dagkung issue, o ma-exposed ang incompetence pagsulbad sa mga bug-at nga problema … mo-resign dayon.
Pananglitan, nakadungog kita nga usa ka cabinet secretary sa America, sa diha nga nakit-an by accident, ang usa ka mahalon kaayo nga relo sulod sa iyang cabinet sa opisina, nauwaw siya, tungod sa pasangil nga midawat siya’g bribe. Mi-resign siya…. Tungod lang sa usa ka relo. Mahimo kaha ni dinhi sa ato?
Unya, karong bag-o, mi-resign ang prime minister sa Japan, tungod kay alang niya, dili niya kaya ang pagpahiuli sa Japan, tapus sa katalagman nga mihapak sa ilang nasud. Ingonman, si Prime Minister Silvio Berlusconi sa Italy, giingon nga mokanaug sa gahom, gumikan sa ilang giingon nga “pressure of world markets which drove Italy’s borrowing costs to record high.”
Daghan pang mga kaso sa pag-resign sa mga lider sa ubang nasud, diin dinhi sa ato, bisag maputos nag maayo sa dautang mga isyo, pugong gyud tama’s ginhawa, manggunit gyu’g maayo sa lingkoranan…pabaga gyud sa nawong, di gyud mo-resign. Tubagon dayon ka: Prove it!
* * *
Gusto konong mag-Presidente si Bong Revilla. Of course, gipanghimakak kini ni Bong. Apan, kun iya kining tinud-on, waa pay seguro, lagmit makabaton na usab kita’g laing Presidente nga artista. Kahibawo man ta nga dinhi sa atong nasud, basta popular lang, segurong modaug.
Sumaa unsay nahitabo ni Senador Jovito Salonga, qualification wise ug kaligdong, walay makalupig kaniya. Apan, ato siyang gisalikway ug si Erap maoy atong gipalingkod sa Malacañang. Alang kanatong mga Pinoy, wala kinahanglana ang qualification … popularity maoy mahinungdanon.
Mao kini kita. Unya, mangutana ra ba dayon ta nganong pobre ang atong nasud. Busa, kun molansar si Bong Revilla, pagka-Presidente, tan-aw nako, basi sa atong mentalidad, seguro siyang mudaog. After all, mas qualified pa tingali siya kay ni Erap.
Si Manny Pacquiao na-Congressman, na-Lt Col. (reserved) sa kasundalohan, lagmit ma-Senador o ma-vice president pa. Nganong di man ma-Presidente? Mao kini kita. Qualification bay atong gibasihan pagbotar nato ni Noynoy?
* * *
Mokilab lang ang tuig. Pila na lang ka pamilok, 2012 na. Unya, mokalit lang pod og butho ang 2013. Maoy hinungdan nga, this early, pipila sa atong mga politiko nanikadsikad na, namugaspogas. Apan, daku ang akong kabalaka nga hangtod karon, wala may kisaw ang Liberal Party, ang supposedly party in power. Ngano man ni Junjun Davide?