Panaghiusa sa mga seniors sa Mabolo

Nagkakita mi si Boy Barias, presidente sa Day Care Center for the Elderly sa Mabolo, ning dakbayan ug daku ang atong kalipay sa iyang gisugilon nga sila sa Mabolo, samtang duha sila ka pundok sa mga senior citizens, apan, nagkahugpong sila sa ilang mga kalihokan. Joint undertaking, matud niya.

Gi-confirm usab kini ni Jun Guinto, presidente sa Centenarian Association of Mabolo Productive Seniors, Inc. (CAMPS), kinsa mipadayag usab sa iyang kalipay sa panaghugpong karon sa ilang mga kalihokan.

Mao ni ang atong gipaabot nga mahitabo sa nagkatibulaag nga mga pundok sa mga senior citizens (ambut ngano) … nga unta hiusahon na nato ang atong mga tumong ug tinguha, after all, alang man kini sa kaayohan natong tanan.

Kay kun mahinayon ang mga laraw sa kadagkuan sa Manila, nga mag-put up kita’g kaugalingon nga party-list dinhi sa Central Visayas, mas gikinahanglan ang panaghiusa. Dili suliran ang pagdaug. Pila ra goy one million votes pagpadaug og at least one nominee.

Pipila sa mga kalihokan nga gihisgutan ni Barias mao ang ilang socialization, physical fitness, ug ballroom dancing, complete with instructors ug mga DIs. Mga kalihokan nga sama niini, maayo kaayo ni alang sa mga seniors. Ug kining tanan, with full support sa ilang barangay captain, Reynaldo B. Ompoc, ug sa maabtik nilang GAD focal person, Emma Colina.

Mao usab kini ang atong gibalikbalik dinhi nga gikinahanglan kaayo ang cooperation ug coordination sa barangay kun buot kitang magmalampuson ang mga kalihokan sa mga senior citizens. Usahay god, di man magkasabot ang barangay captain ug presidente sa mga seniors. Ang uban, matud pa, magtukod og kaugalingong pundok sa mga seniors, atbang sa existing nga pundok, kansang presidente makapasurok sa dugo sa barangay captain.

Anyway, si Brgy Captain Ompoc misaad nga iyang gahinan og igo-igong pundo ang Christmas Party, usa ka grand affair alang sa mga senior citizens sa Mabolo. Gani, si Jun Guinto mi-advance nako’g pangimbitar, ug iyang ipauban si Nick Ampatin, ang main anchor sa Senior Citizens Hour sa DYRC.

Ang Mabolo Seniors mipadala usab og delegasyon alang sa mga seminar sa Building an Elderly-Friendly and Initiatives in Cebu City; Beauty of Aging; ug Early Detection, Prevention and Intervention of Disabled Persons. Of course, mitambong sila sa Senior Citizens Congress, pagtapus sa kasaulogan sa Senior Citizens Month sa Cebu City.

Ang vice president ni Barias, mao si Cristobal Abistado; Secretary, Raymunda Digram; Treasurer, Teresita Cosido, ug Auditor, Jose Lanete.