Replika

Si Oskar usa ka tawo nga kanunay mohatag og komentaryo sa iyahang kauban sa trabaho. Pulos negatibo ang iya nga isulti mahitungod niining tawhana kay sa iyang hunahuna labaw siya niini ilabi na gayud sa abilidad. Apan nanglipaghong siya sa kaulaw sa dihang nasayran niya nga ang maong tawo gikan sa dungganan nga pamilya ug usa ka iskolar sa inilang unibersidad sukwahi kaniya nga mihuman sa yanong eskwelahan ug may pamilya nga dili maayo og reputasyon.

Ang pagbaton og sobra nga pagdayeg sa kaugalingon nakapahimo kanatong mayubiton ug mapagarbohon sa uban. Ug wala lang nato damha nga mismo ang atong kaugalingon mahimong salamin o replica sa atong pagkatawo. Ato nga hinumduman nga matag usa kanato adunay limitasyon ug tagsa-tagsa ka hiyas nga sa iningles pa “individualism” ug dili maayo nga atong ikumpara ang atong kaugalingon sa atong isigkatawo. Atong ibutang sa atong tagsa-tagsa ka alimpatakan nga bugtong ang Ginoo ra ang perpekto.

Matud pa bitaw sa akong nabasahan “Take the simple view of life: keep your eyes open and get on with it.”