Gobyerno'y nalinlang

Nagsanib ng pwersa ang mga kalaban

maraming pinatay na kawal ng bayan;

Ngayo’y lumuluha ang kamag-anakan

ng mga sundalong nagbuwis ng buhay!

Labings’yam sundalo ng ating gobyerno

doon sa Basilan niratrat nang husto;

Ang mga kalaba’y nag-asal demonyo

kabataang kawal hindi na sinino!

Bakit nga ganito ang nangyari ngayon

ang tigil-putukan ay hindi nilingon?

Kaya ang gobyerno ngayo’y nagkaleksyon

huwag magtiwala sa masamang layon!

Dahil sa naganap may mga mungkahi

suspendehin muna peace talk sa rebelde;

Hakbang ng kaaway waring panlalansi –

di sila sinserong bansa ay bumuti!

Dapat lang marahil mungkahi’y masunod

upang pag-aralan hakbang na susunod;

Ang tigil-putukan kung di alinsunod

sa tuwid na landas ay tila baluktot!

Ang kapayapaa’y lalo pang gugulo

kung magpapatuloy gawain ng Abu;

Pero sa pahayag ng ating pangulo

ayaw masuspinde balak ng gobyerno!

Maganda ang hangad ni Pangulong Noynoy

na ang buong bansa mapag-isa ngayon;

Pero sa naganap nanlagas ang Pinoy

ngayo’y lumuluha itong buong nasyon!

Hustisya ang hanap ng nanga-ulila

ng mga sundalong naloko sa digma;

Pinuntahang sector akala’y payapa –

ang naroon pala’y kamatayan nila!

Maraming opisyal ng pamahalaan

gusto’y balewalain ang tigil-putukan;

Peace talk ng gobyerno at mga kaaway

hindi raw mabisa’t gobyerno’y nalinlang!