Kahilakon ko nga naminaw sa report sa DYLA kagahapon sa hapon nga usa ka bata nadakpan sa polis nga iyang gikuotan.
Abi ninyo og nganong kahilakon ko? Gisaysay sa bata, ambot kon tinuod ba, nga napugos lang ang bata sa pagpanguot aron nga makakita siya og kwarta nga ilukat niya og birth certificate kay gipangitaan na siya sa iyang maestra.
Ang 11-anyos nga bata’ng babaye taga barangay Inayawan, dakbayan sa Sugbo. Wala g’yud kuno’y kwarta ang iyang mga ginikanan nga ikalukat og birth certificate para niya mao nga napugos na lang siya sa pagpanguot aron makakwarta.
Kadtong mga malumo og kasing-kasing, daw hilapon ang kahiladman nga maminaw sa iyang saysay. Kamong mga ginikanan ba, siguradoa nga matubag ninyo ang inyong kaakuhan sa inyong mga anak.
Kining hitaboa makaingon man ko nga ang ginikanan sa bata dunay pagkuwang sa iyang kaakohan. Abi ninyo’g ngano? Nganong wala man siya makabantay nga milakaw ang iyang anak? Apil kana sa obligasyon sa ginikanan nga mabantayan ang iyang anak sa tanang higayon.
Aw kun laagan ang ginikanan, utro pa nga laagan ang ilang anak. Busa kamong mga buot mosulod sa gapus sa kaminyoon, huna-hunaa pag-ayo ang inyong responsibilidad ngadto sa inyong mga anak. Gikan sa paghatag kanila og maayong pagkaon, pagpatungha ug uban pa nga panginahanglan.
Duna bitaw ko’y silingan, labaw pa nako kapobre. Apan naghimo g’yud siya’g gamay kaayo nga payag nga kapuy-an niya ug sa iyang mga sakop sa pamilya. Nanginabuhi silang magtiayon sa pagpaninda og sigarilyo, apan wala magpangayo. Ang bana dili nimo makita nga magbarkada, dili mag-inom-inom sama sa uban.
Anam-anam ang iyang pagpalambo sa iyang panimalay. Ingon niini nga matang sa mga tawo akong yukboan. Dili sama anang uban diha nga bisan mayo pa’g lawas apan anaa sa karsada nagkang-kang lang ang kamot sa pagpangayo’g limos.
* * *
Walay nahimo ang mga sakop sa konseho sa dakbayan sa Sugbo gawas sa pagpanglingo-lingo dihang nangayo’g pasaylo si Cebu City Engr. Kenneth Enriquez kanila.
Ang pagpangayo’g pasaylo ni Enriquez tungod kini sa pagpagasto niya sa kwarta nga gitagana unta alang sa pagsemento sa karsada sa bukirang barangay ngadto na sa pagsemento sa mga karsada diha sa North Reclamation Area.
Bisan og nagtoo ang mga konsehal, apil na si Vice Mayor Young, nga igo lang giluwas ni Enriquez si Mayor Rama apan wala sila’y mahimo. Buotan man usab gud si Kenneth nga mitubag sa pangutana sa mga konsehal. Pun-an pa ni City Administrator Jose Marie Poblete nga kalma kaayo manulti, wala na lang magdaghan og kuti-kuti ang mga konsehal.
Buyno, sugyot nako nga atul sa budget deliberation unya sa Nobyembre 4, pagahini lang usab ninyo og hulip nga kantidad ang budget sa road concreting sa mga bukirang barangay nga mas labaw pa sa gigasto ni Kenneth.
Nakasabot ko nga na-bid na man gud kining maong mga proyekto ug na-award na gani sa mga contractor. Na hala, padayona na lang na ninyo.
Alang nako, mas nindot man usab nga monindot na ang mga karsada diha sa North Reclamation Area (NRA) kay usa kini sa mga paagi nga maiban-ibanan ang problema sa trapiko diha sa maong lugar. Kining mga karsada nga gitawag og Third Avenue ug J.L. Briones Street magsilbi na unya kini nga alternate road kun maghuot ang mga sakyanan sa ubang karsada sa NRA.