Usa ka sayong buntag, among kauban sa DYAB Abante pa, Bisaya! nga si Tisha “Inday Tikay” Ylaya nakakita sa aktuwal nga pangilkil sa usa ka polis sa Mactan Cebu International Airport (MCIA).Way pupanagana ang polis nga nibungat og kantidad sa kuwarta nga iyang gipangayo gikan sa usa ka taxi driver.Bisan nagtan-aw silang Inday Tikay ug ubang mga pasahero ug ang nag-alirong nga taxi drivers.
Nag-jacket ang polis maong di makita ang iyang ngan.Apan nahibaw-an ni Inday Tikay ang iyang ngan gikan sa security guards sa MCIA.Nabawo hinuon si Inday Tikay sa pagpangita og mga opisyal nga iyang ka-reklamohan ug complaint forms nga iyang kapirmahan.
* * *
Nibiya na lang ang iyang flight paingon sa kaulohan, wa gyoy napahungawan si Inday Tikay. Apan kay nahibalik man dayon pagka gabii, padayon siyang nangita og opisyal nga iyang kasumbongan. Apan wa gihapoy nakit-an.Napakyas sab ang pagpangita sa complaint forms nga iyang nadunggan nga gipahibawo sa kadagkoan sa MCIA.
Maong naglungotlungot si Inday Tikay nga nipauli sa iyang pinuy-anan.Nakapabuhagay na lang sa iyang programang “BMPM sa Radyo” uban ni June Berongan.Human nabisto ang kasinatian ni Inday Tikay, nagbaha dayon ang mga tawag sa taxi drivers ug ubang mga motorista nga nabiktima sab sa pangilkil sa mga polis ug mga guwardiya sa MCIA.
* * *
Si MCIA General Manager Nigel Paul Villarete niingon nga nitambong siya sa board meeting sa Mactan-Cebu International Airport Authority sa programa ni Inday Tikay maong wa siya kasubay sa kinatibuk-ang detalye.Matud ni Villarete dako og ikatabang kun mobarog si Inday Tikay ug ubang mga biktima sa pangabuso sa mga polis ug ubang kawani sa tugpahanan.
Apan bisan di mopasaka og kaso ang mga biktima, nipasalig si Villarete nga ilang imbestigahon ang tanang pasangil sa kahiwian.Nitataw hinuon nga mas paspas ang imbestigasyon kun dunay isumiter nga mga ebidensiya.Gipahibawo ni Villarete nga duna nay mga polis ug mga guwardiya nga nasuspenso, nataktak ug nabalhin.
* * *
Tubag sa hagit ni Villarete, ug aron pagtabang niya paglimpiyo sa tugpahanan, silang Inday Tikay ug ubang mga biktima sa mga polis ug mga guwardiya sa MCIA magpanon paingon sa tugpahanan karong Huwebes sa buntag.Nagkasabot na silang mopasaka og pormal nga reklamo.Hinaot nga mawad-an na og lusot silang Villarete ug ubang mga tagduma kun magpadayon gihapon ang pangilkil ug pangurakot.
Nisaad pagkuyog ang kadagkoan sa Consumers Rights for Economic Welfare (CREW). Kun nabiktima sab ka, o ganahan nga modasig sa mga biktima sa pagpakabana batok sa mga abusado, mag-abot ta sa ABS-CBN Complex sa alas-8:30 sa buntag karong Huwebes ug magkuyog paingon sa buhatan ni Villarete sa MCIA sa Dakbayan sa Lapulapu.
* * *
Email: leo_lastimosa@abs-cbn.com.