Ang gugma nagdapit kanato nga atong sudlon ang tutulo niya ka mga ganghaan. Ang maong mga ganghaan maoy motug-an kun asa kita kutob diha sa atong paghigugma. Kining maong pamalandong atong gikutlo gikan sa sinulat ni Fr. Joseph Galdon, SJ sa iyang libro nga: The Mustard Seed: Reflection for Daily Living.
1. Ang haw-ang nga ganghaan
Pinaagi lamang sa atong paghaw-ang sa atong kinaugalingong ambisyon kita makapakita sa atong paghigugma. Tinuod matag usa nato dunay mga ambisyon, mga mithi sa atong kinabuhi. Apan kun anaa kita sa paghigugma kini ang magdapit kanato sa paghiklin sa bisan unsang hinakog nga mga emosyon ug kinaugalingon lamang nga katagbawan.
Ang atong Ginoo pananglitan diha sa iyang pagtarok og tolda uban kanato sanglit ang Emmanuel nagkahulogan man nga ang Dios nakigpuyo uban kanato ang mipakita ning akto sa kenosis o paghaw-ang gumikan sa iyang dakong gugma ngari kanato. Kini wala makapaubos sa iyang pagka-Dios hinunoa nipaduol sa iyang pagka-Dios ngari kanato.
Maingon nga siya nakighiusa kanato kita usab makighiusa niya. Diha sa paghigugma duna kay biyaan ug duna kay angkunon. Sa laktod duna kay isakripisyo. Kay diha lamang sa pagsakripisyo imong mapakita ug matagamtaman nga ang imong gisudlan nga relasyon dili diay usa ka dakong dula-dula o dili ba kaha lingaw-lingaw.