Igo ra diay’ng gisil-ing sa mga otoridad ang gidaghanon sa nahibilin ug sa gipangawat nga mga lamppost nga gipanarok sa kadalanan sa kadaplinan sa mga karsada sa tulo ka mga dagkong syudad sa Cebu, Mandaue ug Lapulapu atol sa Asean summit niadtong 2006.
Kini igo ra paghatag og ideya sa Sandiganbayan kun angayan bang ipalarot ang maong mga poste base sa gihangyo ni Mayor Mike Rama.
Walay labot sa maong imbentaryo ang pagsuta sa mga materyales nga gigamit sa maong mga poste kun angayan bang presyohan og tag P250,000 matag usa.
Pero ambot lang kaha sa taga COA kun sa ilang pagpasiplat sa matag poste may makita ba sila sa mga materyales niini nga angayan ug makatarunganong presyohan og tag P250,000.
Kay ang ubang kuryuso nagtuo man gud nga gumikan sa kamahal niini namasin sila nga may sagol nga gold ang maong mga poste.
Mahimong anaa sa lawas nga murag guod sa kawayan, o anaa sa iyang taklob o basin anaa sa iyang sulod nga maoy nakaaghat sa mga taga DPWH pag-approve sa presyo nga gikan sa P175,000 ngadto sa P250,000 matag usa.
Unya giuyonan usab sa mga lokal nga opisyal sa kagamhanan nga nagtugot nga ipananom sa kadaplinan sa karsada ang maong mga poste.
Hinuon mahimong nabayran na ang mga kontraktor niini o wala pa, apan unsa may logic, nganong gipatarok man kana sa mga opisyal sa gobyerno?
Tungod ba kay makatarunganon ang presyo nga gitakda sa kontraktor nga tag P250,000 kay mahalon kaayo ang mga dapat sa matag poste?
O kaha pagbitik lang sa kuwarta sa gobyerno aron masulod sa pribadong bulsa? Di ba?