Utang sa matag Pinoy: P46,240

Mao kini ang utang sa matag 94 milyones ka Pilipino. Kini, at the end of 2010.

Sa ato pa, tapus karong tuiga, muabot nag P50,000 o kapin ang utang sa matag-usa kanato.

Ngiga no? Diin ug asa man ni paingon kwartaha? Giunsa man ni nato? Diin man paingon ang atong gipangutang?

Tapus sa miaging tuig, ang atong utang, domestic ug foreign, mikabat og kapin sa 4 trilyones ka pesos (P4.718 Trillion, to be exact). Kining ato karong infrastructure, public services, health ug education services, agricultural development, ug uban pang kaugmaran nga gipasiugdahan sa gobyerno, are these worth P4.718 trillion?

Unya, kita man ang utangan, nakapahimulos ba kita ning maong mga utanga? Tingalig sila ra!

* * *

Ang mga langyaw mahibong nga samtang ilang makita ang tabunok natong kayutaan, ug kaanindot sa atong klima, ngano nga dili kita maka-produce og igong bugas, hinungdan nga kanunay kitang nag-import og bugas gikan sa mga nasud nga kita ang nagtudlo unsaon pagpadaghan sa ani.

Hinumdoman nga sa 1973 (one year old pa ang martial law, di ba?), gilusad sa Malacañang ang Kilusan ng Wastong Pagkain sa Bagong Lipunan, tuyo niini mao ang awareness ug pag-awhag sa katawhan bahin sa rice conservation ug proper nutrition.

Usa sa nakita sa maong movement, mao nga gumikan sa karaan natong eating habits, libohan ka sakong bugas ang mausik matag tuig. Pila ka parisan ang kaslon matag tuig sa tibuok nasud, ug pila ka sakong bugas ang ibisibis sa matag kinasal?

Unya, sa atong panimalay, ug sa mga restaurant, daghan kaayong momho ang mahibilin sa plato ug sa lamesa, ug kun ato kining tipunon, pila kaha ka kilong bugas ang mahipos sa tibuok nasud. Ingon kita niini ka usikan. Unya, mangutana ka nganong sige tag import og bugas?

* * *

Ang Philippines Global Road Safety Partnership ug ang PNP mitaho nga daghan nang aksidente sa kadalanan ang nahitabo gumikan sa paggamit sa cellphone samtang nag-drive. Gumikan niini, adunay balaudnon (ambut unsa nay nahitabo ini) ang gipasaka sa Lower House nga magpahamtang og silot sa mga driver nga mag-cellphone samtang mag-drive. Ang House Bill 318 mag-impose og multa gikan sa 3 mil ngadto sa 10 mil pesos o bilanggo sa dili molapas og usa ka tuig.

Bitaw, usa kini ka dakung pag-among-among sa ubang tawo. Maayo unta kun ang nag-cellphone ray maamong, bahala na. Hinaut nga nahimo na kining balaud … tinud-on gyud ang implementation.

Usahay ra ba, kutob lang ta sa pagpanday og mga balaud, apan kulang o walay tukmang implementation, hinungdan nga abusado kaayo ang mga Pinoy, kulang o walay disiplina diin ang daghan ang maamong.