Pagpamalandong alang sa Malangkubong Kaayohan

Mahinungdanon kaayo ang namat-an og buot sa usa ka bata. Kini tungod kay mahimong ang bata sa linghod nga panuigon ang makakat-on sa pagsalig sa uban o dili ba kaha ang pagkat-on sa pagduda. Ang kawalay pagsalig sa uban ang maumol gumikan sa mapait nga kasinatian sa pagluib ug pagpusgay sa maong bildo sa pagsalig. Sama pananglit sa usa ka batang babaye nga giunay og lugos sa iyang amahan ang mamahimo kaayong dili na mohatag sa iyang pagsalig sa tanang mga lalaki sanglit ang maong mga lalaki ang nahimong mga hulagway sa usa ka mapait nga kasinatian sa usa ka maulagong pagbanhig.

Mao nga lisud kaayo ang pakigrelasyon sanglit ang nahaunang elemento alang sa usa ka tunhay nga relasyon mao man ang pagsalig. Mahimong kay wala man mosalig, mohimo og mga lakang aron maoy makauna kay lagi, dili man buot nga mahiagom pag-usab sa maong mapait nga kasinatian.

Mao nga ang mahitabo, daghan sa mga tawo ang mamahimong dili makapuyo sa kinabuhing normal gumikan ning maong sitwasyon. Adunay praktikal nga tambag si Tara Bennett Goleman alang kanato: Una, atong umolon ang mga bag-ong relasyon sa mga bag-ong higala.

Ikaduha, atong duawon ang mapait nga kasinatian diin nawala ang atong pagsalig ug sa maong pagduaw imong ipabuhagay ang imong kalagot sa imong abuser.

Mao kini ang mahinungdanong emotional step. Ang timailhan nga nakalingkawas ka mao nga dili kana mohimo og pang-abuso sa maong relasyon nga imong sudlan ug dili ka motugot usab nga ikaw abusohan.