Tug-ani ko ninyo

Dunay mitug-an namo sa The Freeman nga ang nagpaluyo sa pagpamutol og mga kahoy sa government reforestation project diha sa barangay Sudlon mao ang usa ka tagdumala og iladong kooperatiba dinhi sa Sugbo. Mao ba? Awhagon nako ang informer nga pakigkitaan ko niya aron hatagan og dugang kasayuran kabahin sa maong binuang nga gipangputol ang mga 600 ka punoan sa kahoy sa bukid.

Dili man gud mahimo nga igo ra kita moingon nga ang usa ka kooperatiba maoy nagpaluyo sa pagpamutol sa kahoy. Malipay kaayo ko nga moabi-abi sa mga reklamo gikan sa publiko nga naglambigit og anomaliya.

* * *

Nindot kaayo ang kamandoan ni Mayor Michael Rama ngadto sa mga departments sa City Hall nga nag-render og “frontline services” nga modistino sila og mga kawani nga moserbisyo sa publiko bisan sa panahon tingpaniudto o kaha bisan lapas sa “office hours.” Natan-aw man gud nako nga daghang kawani diha nga alas 11 pa gani magkaon na sa paniudto unya inighagtok g’yud sa alas 12, matulog dayon. Alkanse man ang gobyerno ana kay sa oras nga sila nagkaon, gisweldohan pa sila.

Ang tukma mao nga inigka-alas 12 sa udto na sila mokaon, apan gigamitan kita nila og inantigo, ug ang mga hingtungdang opisyal sa kagamhanan wala lang usab magtagad.

Usba na palihug kining maong baliko nga batasan.

* * *

Nindot g’yud kaayo ang gihimo sa mga opisyal sa dakbayan nga gipang-ilisan nila og Light Emitting Diode (LED) ang mga suga sa traffic lighting systems kay nakapaminus kini sa gasto nato sa kuryente.

Gipahibalo ni City Hall public information officer Carlo Dugaduga nga mikunhod g’yud og katunga ang bayranan sa dakbayan matag buwan. Kaniadtong Oktobre sa wala pa itaud ang maong mga LED diha sa traffic lighting systems, ang dakbayan mogasto og tag P338,000 ang buwan.

Nag-anam og us-os ang bayranan sa dakbayan ug kaniadtong Agosto ang electricity consumption sa dakbayan sa mga traffic lights matag buwan miabot na lang og kapin sa P126,000.

Daghan pa kaayo nga angay’ng himoon aron mokunhod ang gastohanan sa dakbayan. Usa niini mao ang pagputol sa paghatag og dagko kaayong monthly allowance sa mga opisyal sa kagamhanan.

Apan tan-aw nako makuli kini nga mahitabo tungod kay imbis kini himoon, gipahatagan pa man gani ni Mayor Rama og tag P5,000 ang buwan ang mga kapitan sa barangay.

Unya, dunay mga kawani sa kagamhanan nga wala g’yuy mga trabaho. Pananglit sa City Hall, dunay mga consultants nga nagdawat og dagkong honoraryom nga wala g’yuy obra. Walay labot sa uban nga nagtinarong.

* * *

Salikwaot g’yud kaayo kun tigpatuman ka sa balaud unya utro ka pa nga magpabadlong. Sa operation sa Land Transportation Office (LTO) didto sa Gorordo Avenue kaniadtong miaging gabii, sakop sa CITOM nag-drive og motor nga walay side mirror ug ponder ang suga sa luyo.

Gawas sa maong kalapasan, ang plate number pa sa motor anaa pa niya gibutang sa kilid. Unsaon nato pagkakuha og respito sa mga drayber ug ikaw nga usa ka enforcer utro pa nga badlongon?

Ako mismo ang mipahimangno sa maong traffic enforcer nga magtarung kun gusto pa siya nga makapadayon sa pagtrabaho sa City Hall kay daan na nga mibahad sila si Mayor Rama nga taktakon kadtong magpakauwaw sa grupo.