Uban sa mga bata

Nindot kaayo ang pagdula uban ang mga bata. Kini tungod kay sila pahinumdom bisan pa man sa mga kalisud adunay kagaan ang karga sa kinabuhi ug kay gaan, angay lamang nga isaulog. Nga bisan pa man sa kalisdanan karon, dili angayan nga wad-on ang “Sense of Humor” matud pa ni Tara Bennett Goleman sa iyang libro nga Emotional Alchemy.

Ang lightheartedness ug playfulness maoy naghimo sa usa ka tawo nga makasinati sa kalinaw ug kalipay diha sa iyang kasingkasing taliwala sa mga kagubot ug mga kabalaka nga padayong miabot sa atong kalibutan ug katawhan karon.

Balik sa mga bata. Dili tiaw ang kalipay nga masinati ko kun hagwaon ako sa usa ka bata ug sa tinud-anay lang, mawala ang akong stress sa matag higayon nga dunay bata nga akong sapnayon samtang mapahiyumong nagtan-aw si mama niya. Ang mama niingon: “Angayan man lagi kang mokugos og bata!”

Apan suod nako ang mga bata kay daghan akong makat-onan gikan kanila. Sa matag higayon sa kasubo ug sa kalibog, sila ang akong unang sud-ongon, sila ang una nakong ikakukabildo kay diha kanila nakita ko ang paglaum ug ang hinungdan kun nganong angayan pa akong mopadayon diha sa pagginhawa. Buot nilang isangyaw ug isilsil sa akong alimpatakan ug kasingkasing. “Malipayon ug mabulukon ang kinabuhi taliwala sa ka-komplikado niini, busa angay lamang nga ikaw magsaulog ug magpagarbo. Dili tungod sa mga attachments sa imong pagkatawo kundili sa imong talagsaon nga pagkatawo nga nakapahimo nimong lahi ra gyud kay sa uban...”