Di mabangbang sa mga kaparian ug mga madre ang kaisog ni Kongresista Tomas Osmeña bisan pa kun gamitan nila kini og higanteng kruz aron malumoy sa iyang suporta sa tukoronong flyover atubangan sa Asilo dela Milagrosa.
Wa mahadlok si Kong. Tom sa mga bahad ni Arsobispo Jose Palma nga mopalihok sa mga kaparian niining dakbayan aron suportahan ang gisugdan nang rosario sa mga madre nga gipangunahan sa mga madre superiora sa Asilo aron batokan ang laraw sa pagpatarok sa usa ka flyover sa maong lugar.
Gani gihagit sila ni Kong. Tom nga mas maayo pa og mamiya ang maong mga madre nianang sa Asilo ug ibaligya nila kanang lugara nungka nga magbabag-babag sila sa naplastada na nga plano sa pabarugong flyover sa maong dapit.
Dinhi masukod kun unsay gahum sa mga pangadye ug pagrosario sa mga madre batok sa mga banggiitang politiko nga gisuportahan usab sa ilang mga dumadapig.
Ang pagrosario usa sa matang sa hinagiban sa mga madre batok sa mga dautan ilabi na sa mga tawo nga gituohan nilang nasudlan og dautang espiritu ang pangisip.
Busa kun ila kining gigamit , murag nagpasabot nga dili maayo ang ilang pagtuo sa anaa karon sa huna-huna ni Kong. Tom nga malagmit usa kini sa labing nakapapungot sa kanhi mayor sa dakbayan sa Sugbo.
Apan ang tanan nasayud nga si Kong. Tom adunay kaugalingong prinsipyo nga lisud kaayong mahulga ug di gusto magpalupig.
Gani kining isyuha karon misamot na sa pagsilaob ang ilang panagbangi ni Mayor Mike Rama ug bag-o niyang ikasangka ang mga pari ug mga madre, unya wa kahay plano si Gobernador Gwen Garcia nga mosalmot usab ning maong kalambora?
Nasayran ra ba sa tanan nga tandugon kaayo ang relasyon ni Kong. Tom ug si Gov. Gwen, ug mao pay pag-ingnon nga tagsa ray lag-id paka dayon.
Dinhi nakulit sa hunahuna sa mga tigpaniid nga kun sangpiton sa mga madre si Gov. Gwen hayan nga mosamot kaalegre ang maong kombati. Di ba?