Bisan asa siya ibutang bibo gyud ang resulta. Bisan unsa iyang himuon duna gyu’y resulta. Sa laktod, makapabuhi og patay kining tawhana nga akong higala nga usa ka yanong mag-uuma. Bisan tuba ra ang among tagay apan kami gyud malipay basta siya mosugilon na og mga sugilanong kataw-anan apan dunay pagtulon-an.
Kining tawhana ang makakita gyud og rason kun nganong kinahanglang magsaulog bisan pa man sa kayano sa panghitabo. Kaon, inom, talidhay ug kukabildo mao ang mohulagway sa pagkatawo ning akong amigo. Bisan tigulang na siya apan dili gyud ako pul-an nga mamati sa pagtulon-an niya.
Daghan kanato karon ang nangita og katagbawan sa bisan unsang paagi. Ang nakadaut kay lagi buot kita og shortcut mao nga atong gisalindot ang mahinungdanong papel sa usa ka proseso.
Ang resulta, malipay man tuod ta apan kining kalipaya usa ka taphaw lamang nga kasinatian ug dili usa ka milagrosong panghitabo nga nakapausab sa atong hunahuna ug kasingkasing alang sa kaayohan. Daghan tuod nato ang nagpunay og katawa bisan walay kalipay nga sa atong mga ngabil ug mga mata mibathay.
Matud pa ni Alexander Chalmers.” The three grand essentials of happiness are: “Something to do, someone to love, and something to hope for.” Kun kini ato lang mahuptan sama sa akong higala, nan, dili unta las-ay daw patay ang kinabuhi. Kundili kita buhi ug madagayaon pa gyud kini.