Ang wa maplano nga pagsabak sa mga babaye nga minyo ug di minyo di lamang suliran nga gisagubang sa mga Filipino kundi sa tibuok kalibotan.
Gani usa kini sa gihingusgan karon sa mga lider sa nagkalainlaing nasud sa kalibotan lakip na ang Pilipinas nga unta makat-onan sa kababayen-an ang hustong depensa aron nga di sila magsabak sa panahon nga di pa sila andam sa pagbuhi og anak.
Usa sa natumbok nga hinungdan nganong makapanganak bisan di pa sila andam sumala sa mga batid, mao ang pagkuwang sa mga tulunghaan sa pagtudlo bahin sa safe sex education o luwas nga pakighilawas.
Sa mga survey nga gihimo, nasayran nga didto sa Egypt gi-praktis sa mga kababayen-an ang pagkaligo human makig-sex sa lalaki, apan nasuta nga di 100 % nga epektibo kay aduna lang gihapoy magsabak.
Samtang sa Thailand gisagop usab sa mga babaye ang pakig-sex ngadto sa mga lalaki sa panahon sa ilang menstruation, apan mao gihapon ang resulta , namatud-an nga di gihapon luwas ang maong paagi .
Busa nasuta sa mga pagtuon nga kun ang pagtudlo bahin sa pagka-abogado, doktor, enhinyero ug uban pang kurso anha na sugdi inig-tungtong na sa kolehiyo sa usa ka estudyante, lahi ang pag-edukar sa babaye ug lalaki aron nga di manganak sa panahong di pa sila andam manganak, kay gikinahanglang sa una pa lang ang-ang sa pagtungha niini sa elementary isilsil na sa ilang alimpatakan ang tukmang mga paagi aron di makapanganak nga wala planoha.
Ang sex education di lamang matang sa edukasyon nga magtudlo unsaon pag-perform ang sexual intercourse kundi edukasyon nga magtudlo bahin sa pagplano sa pamilya.
Sa panahon ni Adan ug Eva wa pay sex education , apan daan nang gipapatik sa Dios sa Biblia ang mando Niya sa unang mga tawo nga kinahanglang magdaghan ug lukpon ang tibuok kalibotan, ug kun mapuno na, kinahanglang “magpugong sa pagpanganak.” Di ba?