Pagbati

Usa nako ka higala ang nagkanayon nga sa dihang siya nasuko pag-ayo, iya lang gyud nga gihunahuna nga kini dili maayo, nga kini supak sa kabubut-on sa Dios. Apan husto ba gud nga dili nato paminawon ang atong kaugalingong pagbati ni atong tugotan ang mga prinsipyo nga maoy mopuo sa natural nga panghitabo sa atong kaugalingon? Ang tubag, dili. Maayo nga dunay giya o prinsipyo nga atong gisubay. Apan hibaw-i baya nga ang pagbati angayang paminawon. Nga ang pagbati angayang angkunon. Kay kondili nimo kini angkunon, ang imong kaugalingong pagbati ang mamahimo nimong kaaway nga imong pakigbatokan puhon.

Angkona nga ikaw nasakitan, nga ikaw nahiubos, nga ikaw naglagot o dili ba kaha ikaw nahigugma. Makita nimo ang kalainan. Mahimo kang gawasnon ug mahimo kang natural sa imong mga lihok. Apan hibaw-i ug hinumdomi lamang nga ang maong pagbati ang angayan usab nimong ibutang sa konteksto sa pakiglambigit sa uban. Nga sa ato pa, kini nagpasabot nga dili lang pud ka magpatuyang.