EDITORYAL - Mahalong sakyanan nawagtang

Kun ang matag opisyal nga idestino sa mga ahensya sa gobyerno magtinarong lang, di tingale mabalitaan sa mga magbubuhis ang giingong 172 ka mga mahalong sakyanan nga nawagtang sa Subic Free Port.

Ang maong matang sa mga sakyanan di sama sa tungaw nga og di mokatol ang imong kunot nga pasukan niini di ka kaalinggat nga eksistido diay siya.

Ang maong mga sakyanan di mahitabong mawagtang kun wa kini tuyoa pagkuha ug kun sa maong pagkuha way pagtugot sa mga kadagkoan sa maong puwerto, ug kun sa maong pagtugot way mga linging   katarungan nga nagpahipi.

Sa laktod ang gipili nga mga opisyal nga maoy gidestino sa maong ahensya di kapiyalan ug sayon kaayong nakaako sa pagtunto sa mga Pilipino.

Mao bitaw nga sa pagdestino og mga opisyal sa sensitibong opisina sa gobyerno buot ipasabot nga opisina nga dali kaayo ang panguwarta , kinahanglang hashasan gyud pag-ayo ang pagkatawo niini.

Di lamang sa iyang kamaayong laki kay dako kaayo og nakab-ot nga edukasyon kundi ang track record niini sa pangatungdanan ug ang iyang relihiyon.

Kay   diha sa pagtino sa iyang relihiyon makapanghangyo ang mga lider sa gobyerno nga nag-appoint nianang tawhana nga magpatabang sa kadagkoan sa relihiyon sa maong tinudlo   sa pagmonitor aron  sa pagpahimangno kaniya matag karon ug unya nga di mangawat ug di moapil sa mga kawatan sa opisinang iyang gitrabahoan aron di maduhig sa kauwaw ang iyang relihiyon.

Kay ang tinuod kun sa atong nasud wa pa mabahin-bahin   ang katawhan pinaagi sa pagpamalhin ngadto sa mga nagkadaiyang relihiyon nga ilang naayonan, pastilan unsa na kahay nahitabo sa atong nasud.

Ang tinuod ang mga lider sa minoridad nga relihiyon sa nasud, nakatabang kaayo sa gobyerno sa pagsanta sa kagrabi sa krimen tungod kay naningkamot usab sila nga kutob sa ilang miyembrong yabag, mapitol pinaagi sa mga espirituhanong pahimangno. Di ba?