Manny Pacquiao nagdamgo

Hinaut pa nga ma-amendar kining "Juvenile Justice and Welfare Act" nga nahimong balaud niadtong tuig 2006.

Kining maong balaud maglibre sa mga bata nga nagpangidaron og 15 anyos paubos sa bisan unsang tulubagon sa krimen nga ilang mahimo. Ang mga nag-edad og 16 ngadto sa 18 anyos libre usab sa bisan unsang criminal liability kun wala sila masayud sa ilang gibuhat.

Tungod niining maong balaud, gigamit ang mga bata sa paghimo og krimen sama sa paghimo kanilang courier kon tigdala og mga iligal nga butang sama sa drugas. Himoon usab silang mga snatcher, mangunguot, holdupper ug uban pang buhat sa mga propesyonal nga kriminal.

Mag-ampo kita nga ang Senate Committee on Justice nga gipanguluhan ni Sen. Chiz Escudero, diin sakop usab si Sen. Tito Sotto, maka-amendar niining maong balaud nga gipangamahanan ni Sen. Kiko Pangilinan.

* * *

Grabe ang baha sa Cebu City bisan kun gamay lang ang ulan sa kabukiran. Nagmatuod lamang kini nga kining pag-abuso sa mga tawong hakog nga mipatag sa atong kabukiran mao ang hinungdan niini.

Magpasalamat kita nga gihatagan kini og seryosong pagtagad sa bag-ong namunuan sa Cebu City Mining Regulatory Board (CCMRB) apan grabe na kaayo ang kadaut sa atong kabukiran nga lisud na gayud kapugngan ang kalamidad.

Nasayud akong dili superman si CCMRB Chairman Rene Mercado apan dalaygon ang iyang panglimbasog sa pagtabang sa city hall aron maminusan ang katalagman dala sa baha nga makahatag og daku'ng problema sa katawhan. Gihimo kini niya nga wala gani magpaabot og sweldo gikan sa siyudad ug bisan sa kadaghan niya og buluhaton sa iyang pribadong mga kompaniya.

* * *

Modagan kuno si Sarangani Congressman Manny Pacquiao pagka-bise presidente karong tuig 2016. Sumala pa niya nga nianang tuiga mohunong na siya sa pamoksing.

Samtang adunay ubang mga tawo nga misaway sa iyang ambisyon tungod sa iyang pagkamubo og grado apan iya kanang katungod. Kinsa man guy magtoo nga mahimong presidente si Erap Estrada ug bise presidente si Noli de Castro.

Ang iyang problema mao nga samtang nianang tuiga, 37 anyos na ang iyang edad, tiguwang na nga mopadayon pa siya pagpakig-away sa ibabaw sa ring apan bata pa usab hinoon siya nga molansar pagka-bise presidente. Ubos sa atong batakang balaud, 40 anyos ang labing minus nga edad sa modagan pagka-presidente ug bise presidente.

Kinahanglang mopaluyo si Pacman sa mga kongresista ug senador nga buot mousab sa atong batakang balaud ug mangusog nga minusan ang age qualification sa buot modagan sa pagka-presidente ug bise presidente. Kun dili gani, kining damgo niya magpabiling damgo lamang.

* * *

Uyon ako sa usa ka balaudnon nga maglibkas sa balaud nga magbuot og drug test sa tanang mga bag-ong aplikante ug sa mga mo-renew sa ilang driver's license.

Ang House Bill 1023 nga gipangamahanan ni Cebu 4th district Representative Benhur Salimbangon magbuot nga kadto lamang mga tawo'ng adunay criminal record, adunay mga kaso sa hukmanan ug ang mga adunay traffic violation citations ang kinahanglang magpa-drug test sa Land Transportation Office (LTO).

Daghan kaayong tigamitan og ginadiling drugas ang nakalusot niini kay nasayud man sila kun kanus-a ma-negative sa drug test. Ang uban mobayad lamang sa mga laboratory aron malimpiyo ang resulta sa test. Unya na sila mogamit og drugas kun human na ang drug test. Namatud-an kini sa LTO sa mga drayber nga positibo og ginadiling drugas nga naaksidente. 

Walay pulos kining drug test hinunu-a gigamit lang kining pangwarta sa mga laboratory ug sa ubang mga sakop sa LTO.

* * *

Nganong maproblema man ang mga local government units (LGUs) sa ilang mga basura? Anaa nay daghang teknolohiya nga mogamit og basura alang paghimo og abuno kon fertilizer ug enerhiya.

Daghang mga foreign companies ang andam moabag sa mga LGUs sa ilang problema sa basura ug paglimpiyo sa ilang labayanan sa basura nga walay gasto.

Kun adunay LGU nga buot masayod niini tawga/text ko sa cell no. 092204823733 o sa akong email.

Email: [email protected]