Pahimangno ni Bishop Tagle

Usa sa mga mahinungdanon kaayong pahimangno ni Bishop Tagle sa Dyosesis sa Imus kalabut sa sala nga Gluttony mao kini:"Hindi talaga kaya natin Lahat!" Sa ato pa, dunay limitasyon ang tanan bisan gani mismo diha sa pagkaon. Dili mahagkom ang tanan ug kay dili man mahagkom gikinahanglan ang temperance aron dili kita maghunahuna sa bisan unsa nga sobra sa atong mahimo.

Kadaghanan kanato ang nagtuo nga kita mga superman nga mahimo nato ang tanan. Kini nagpakita nga kita usahay mga sirok sa bisan unsang mga butang. Diha pa kita makaamgo nga lisud gyud diay ang atong gihunahuna sa mga higayon nga moabot na ang pagpaningil mismo sa atong lawas nga atong giabusohan pag-ayo dili ba? Diha pa kita makaamgo nga ang bisan unsang naghinobra ang nagdala diay og kasakit inay kalipay sa bisan unsang aspeto sa atong kinabuhi.

Balik sa pagkaon. Nahinumdom ako sa akong Italyanong Propesor nga si Padre Dominic Gaioni, SVD sa iyang pag-ingon "EAT LIKE A PHILOSOPHER." Mao nga karon kabahin sa akong personal nga programa ang paghinay sa pagkaon ug pagpili sa pagkaon nga gikinahanglanon lamang sa lawas. Ug gani, dunay higayon nga kaon akong gisuka tungod kay kuyog nila ang pagkaamgo nga dili tanang mga pulong o mga panghitabo ang mahimong tunlon bisan pa man kun kini pagausapon.