Naproblema na hinuon pag-ayo karon si Kongresista Tom Osmeña gumikan sa pagsuway niya og donar ngadto sa mga di Katolikong pundok sa Osmeña Shrine nga iya diay sa Kapitolyo.
Gikuninitan siya karon sa mga molupyo sa lugar nga giplanohan niyang himoong menteryo ug labaw sa tanan gikiha siya sa Kapitolyo gumikan niining maong plano.
Ambot mura man nuon og gidimalas pag-ayo si Tom niining kalakiha.
Kay ngano ba usab nga mipasalig man siya sa mga di Katoliko nga iyang hatagan og menteryohan nga unta siyudad man ni ug bisan mga kabus nang mga tawhana makaabot man sila sa pagbayad sa mga pribadong menteryohan.
Kun kana nalang usab nga isyu bahin sa menteryo maoy makahasol sa mga opisyal sa gobyerno ug madaot nalang usab ang dungog sa relihiyong nangayo niini, angay baya kining pakgangon sa mga kadagkoan sa maong relihiyon.
Kay di maayo nga mura na silag magpakilimos og menteryo nga unta di baya kini maoy importante sa kaluwasan sa kalag sa tawo.
Lahi sa mga Katoliko nga mas labaw pa og bili ang menteryo kay sa simbahan ug gani kasagaran sa mga menteryo niini eksklusibo lamang sa Katoliko ug di palubngan og taga laing relihiyon.
Lahi sa ubang relihiyon nga mas prayoridad kanila ang simbahan bisan pipila lamang sila ka pudyot bahala na’g sa panahong mamatay magbayong sa lungon murag namaligya og isdang dubok tungod kay giisip nila nga diha sa simbahan matagana sila sa kaluwasan.Usa lang ka butang ang ilang gituohan nga sa pagbalik ni Kristo bangunon ug haw-ason sila gikan sa menteryo.
Busa mas maayo pa og kalimtan ni Tom kining tanan ug ihatag sa Kapitolyo ang maong yuta aron di kaayo siya mahasol kay ang mga nangayo niya niini mosabot ra sa iyang pagkabutang ug di makalimot kaniya. Di ba?