Binuang sa BFP?

Saludohan nako si Cebu City Fire Marshall Aderson Comar tungod sa iyang kaisog pagbutyag sa giingong anomaliya sa pipila ka kauban niya nga bombero.

Si Comar mismo ang miawhag sa Ombudsman-Visayas nga susihon ang maong giingong binuang sa iyang mga kauban. Pwerteng sukoa ni Comar kay ang usa sa giingong nakahimo og binuang gidistino man hinoon og maayong pwesto.

Seryoso kaayo kini nga pasangil ug angay kini nga himoan g’yud og diha-diha nga imbistigasyon sa Ombudsman.

Sayonan ka nga ang report ni Comar ngadto ni Regional Fire Marshall Maria Luisa Hadjula mao nga ang kanhi hepe sa Cebu City fire safety enforcement section direyot gani kuno madakpi sa entrapment operation.

Wala hinoon hinganli ni Comar sa iyang report sa Ombudsman kun kinsa ang giingon niya nga opisyal sa Cebu City fire station nga direyot madakpi sa entrapment operation, apan iya kong gitug-anan sa ngalan niini. Dili lang usa nako hinganlan kay wala pa raba ang iyang ngalan sa dukomento apan sigurado ko nga molutaw ra ang ngalan sa maong opisyal sa kabomberohan kun ang isyu imbistigahon na sa Ombudsman.

Ang binuang gihimo ingon niini. Kun dunay bag-ong building nga wala pa gani mahuman sa pagtukod, ila nang buhat-buhatan og report nga kuno nakakompleto na sa mga gikinahanglan basi sa lagda sa Fire Code of the Philippines.

Ang Fire Safety Inspection Certificate nga iisyu sa kabomberohan mao kini ang gamiton nga makakuha ang tag-iya og occupancy permit gikan sa Office of the Building Officials.

Dunay usa ka building nga gitukod diha sa IT Park sa barangay Lahug nga bisan og daghan pa ang kuwang sa mga gikinahanglang kagamitan, apan giisyohan na kini og FSIC.

Basi sa report ni Comar ngadto sa Ombudsman nga ang nag-inspection sa building mao sila si Fire Safety Inspectors Ronnie Magalang, Roy Arellano ug Primo Zabala Jr.

Seryoso kaayo ang pasangil ni Comar kay tiaw mo nga bisan kuno’g wala makatuman sa gilatid nga lagda ang tag-iya sa building apan isyuhan lang gihapon og Fire Safety Inspection Certificate?

Misamot og kahimangod si Comar kay bisan og duna siya’y report ngadto ni Hadjula kabahin sa gihimo sa tulo ka Fire Safety Inspectors apan naunsa ba nga giisyohan man hinoon niini og order nga nagpausbaw pa sa ilang posisyon.

Bisan ako nakapanglingo-lingo nga nagbasa sa report ni Comar ngadto sa Ombudsman. Gisuwayan nako’g kontak ang opisina nila ni Magalang apan silang tulo wala didto sa ilang opisina.

Angay g’yud nga tubagon nila kay bug-at kining maong pasangil. Tiaw mo, kaniadto pang Pebrero nga giisyohan nila’g FSIC ang usa ka building ang Aegis People Support Phase 1, apan dihang gisubli kini pagpa-inspection ni Comar nga siya na ang fire marshall kaniadtong Hunyo, nasayran nga wala man diay makakompleto ang building sa mga fire safety measures.

Pastilan, ngano kaha nga giisyohan man ninyo og fire safety certificate? Apil nga angay’ng manubag niini mao sila si Koronel Hadjula ug si Koronel Esmael Codilla nga maoy mga dagkong opisyal sa Bureau of Fire Protection dinhi sa reheyon.