EDITORYAL - Ang negosyante ug religious leader

Mura’g maglisod ang gobyerno sa pagpatigbabaw sa katuyoan niini nga mahimong balaod ang RH Bill tungod kay gigawngan ang Kongreso sa mga magbabalaod nga negosyante ug sa mga lider sa dominanteng relihiyosong pundok sa nasud.

Ang mga negosyante ug ang mga lider sa higanteng relihiyon sa nasud naghiusa sa pagbatok sa RH Bill tungod kay ang ilang gihunahuna mao ang kaugalingon nilang interes ug wa maghunahuna sa interes sa mga kabus nga magtiayon.

Lahi sa tinuod nga lider sa gobyerno kansang tinguha mao ang pag-edukar sa magtiayon aron nga di kaayo mabug-atan sa pagpuyo ug sa pagpanginabuhi pinaagi sa pagtudlo sa hustong paagi sa paghimo niini diha sa RH Bill.

Ang gilantaw sa hustong lider sa gobyerno mao ang ekonomiya sa nasud nga kun sagkaon sa pagkakaron nga 90 milyones pa ang populasyon sa nasud daw unsa na kaha kun anaa na kini sa 150 milyones sa pipila ka tuig nga umaabot.

Ang mga Amerikano kinsa nakatagamtam sa kaabunda sa ekonomiya kaniadto ug sa kaharuhay sa pagpuyo nakaantigo sa pagkontrolar sa ilang pagpanganak bisan luyo sa kamatuoran nga wa sila magdahom nga mosukarap ang ilang ekonomiya sama sa gidangatan niini karon.

Kun nasugamak sa maong suliran ang labing datu nga nasud sa kalibotan, kini pa kahang Pilipinas nga nag-ilaid na daan sa kalisud sa ekonomiya?

Apan sa laing bahin kun gikabalak-an sa mga negosyanteng Pilipino nga wala na unya silay mahimong sulogoon o kaha kliyente kun mobahar ang populasyon sa nasud pinaagi sa RH Bill sama sa hunahuna sa mga paring Katoliko , nganong ang China kinsa misagop sa One Child Policy nahimo naman hinuon karong labing adunahan sa tibuok kalibotan? Di ba?