Gi-umentuhan sa Regional Tripartite Wages and Productivity Board (RTWPB) ang minimum wage sa mga trabahante sa Central Visayas.
Bisan gamay ra kaayo kini sa gipangayo sa labor sector apan mao kini ang labing taas nga umento sa sweldo nga nahatag sa RTWPB. Ang nakaparat pa gayud kay walay labut sa umento ang mga empleyado sa gobiyerno. Mao ba kini ang gitawag og consuelo de bobo?
* * *
Bisan layo pa ang eleksiyon daghan nang pagpangandam ang gihimo sa matag habig. Sumala sa usa ka inilang politiko nga sakop sa oposisyon nga gisultihan siya sa suod ni Kong. Tom Osmeña nga buot sa kongresista nga makigsulti kaniya atol sa usa ka panihapon.
Hatagan usab kuno ni Kong. Tom ang mga barangay kapitan sa Cebu City og mga Samsung Galaxy tablets (personal computer). Sumala sa mga alalay sa kongresista nga dili kuno kini pamolitika. Mao ba? Pagka-manggihatagon na gayud ni Kong. Tom karon no?
* * *
Sumala sa usa ka US Embassy cable nga gipahibawo sa Wikileaks nga ang mga Sugbuanon uyon niining vigilante killings kon pagpamatay sa mga kriminal, apil na kining gidudahang mga malapason sa balaud.
Morag ilang gilambigit kadtong pahibawo kaniadto ni Mayor Tomas Osmeña nga magtukod siya og "Hunter Team," usa ka special police squad nga maoy mogukod sa mga suspetsadong kriminal ug iyang hatagan og P20 mil sa matag kriminal nga "permanently disabled and nuetralized."
Bisan tuod og daghang mga Sugbuanon nga mipaluyo niining katukuran sa vigilante group mikisikisi ang simbahang Katoliko ug ang mga sakop sa Integrated Bar of the Philippines (IBP) niini. Dili usab kini makaayo sa imahen sa Pilipinas ngadto sa ubang kanasuran.
Kinahanglan klarohon ni kanhi mayor ug karon Kong. Tomas Osmeña kining maong report kay lain kaayo kini og gipasabut.
* * *
Ilisdan ni Pres. Aquino si Customs Commissioner Angelito Alvarez human sa 14 ka buwan nga paghupot niya sa adwana. Si kanhi kongresista, nga nikandidato sa pagka-senador ubos sa Liberal Party, Ruffy Biazon ang itudlo nga bag-ong pangulo sa maong buhatan.
Ubos kang Alvarez nangawala ang hapit dos mil ka mga container vans ug migrabe ang smugglling sa nasud. Kulang usab og kapin sa 20 bilyones pesos ang koleksiyon sa customs sa miaging tuig.
Sumala ni Sen. Ping Lacson magpundok kuno ang mga opisyal sa customs matag Biyernes sa usa ka dapit sa Port area aron magbahin sa ilang makurakot.
Akong gipaabut nga adunay lapad nga lahugay sa customs iniglingkod sa bag-ong customs collector. Daghan na karong mga customs officials ang nagpatabang sa mga politiko aron dili sila mapulihan o kaha aron sila madestino sa mas nindot nga mga pwesto.
* * *
Akong pasalamatan si kanhi Cebu Passport Office Director Angel Espiritu sa pagpa-ambit sa iyang expertise sa natad sa diplomasiya ngadto sa mga buhatan nga buot makat-on niini.
Si Espiritu nadestino nga consul-general sa nagkalainlaing nasud sa kalibutan. Nagkakuyog sila si kanhi Ambassador Frank Benedicto sa foreign affairs office sa Canada, India ug uban pa.
Bisan retired na sa government service, dili pa siya "tired" sa pagtabang sa atong gobiyerno. Dir. Angel Espiritu, you're really an angel.
* * *
Kadtong hilahila (bush snail) sa Borbon nga gitawag og takyong makita usab diay sa ubang mga dapit sa Sugbo nga anaay kakahuyan.
Daghan kini sa Bgy. Agsungot, Cebu City nga gitawag nila og mayot. Sa San Fernando gitawag kini og taklong.
Apan mas maantigo ang mga opisyal sa Borbon kay ilang gihimong dakung negosyo ang takyong nga himalitan na kaayo sa mga tawong nasayud niini.
* * *
Email: mannyrabacal@yahoo.com