Waldas sa pork barrel
Ang report sa Department of Budget and Management nagpakita nga labihang gamaya ra sa kantidad gikan sa ilang pork barrel ang gigahin sa atong mga kongresista dinhi sa Sugbo alang sa health programs.
Gani ang datus sa DBM nagkanayon nga wala ra makaabot og 15 porsiento sa kinatibuk-ang kantidad nga gidawat sa pito nato ka mga kongresista sa Sugbo isip pork barrel ang ilang gigahin pagtabang sa mga kabus nga nagkinahanglan og tambal ug pambayad sa hospital.
Ang matag-usa ka kongresista dunay P70 milyones nga pork barrel matag tuig nga sa ato pa kun atong ipunon mokabat ni og 490 milyones pesos sa usa ka tuig way labot niini ang ila sa duha ka mga kongresista dinhi sa dakbayan sa Sugbo nga sila si Tomas Osmeña ug Cutie del Mar.
Apan samtang sinsiyo lang ang gigahin sa atong mga kongresista pagtabang sa mga kabus ang uban nila atong madunggan nga nagwari-wari sa ilang pork barrel.
Usa sa klarong pag-usik-usik sa pundo mao ang laraw ni Osmeña nga mamalit og “Samsung Galaxy Tablet” alang sa tanang barangay kapitan dinhi sa dakbayan. Kini aron kuno magamit sa mga kapitan pag-monitor sa mga proyekto diha sa ilang barangay. Ang usa ka tablet mokantidad og dili mominus sa P20 mil.
Unsa ba gyud ka importante ang tablet pag-monitor sa mga proyekto? Ug unsa man nga mga proyekto diha sa kabarangayan ang kinahanglang i-monitor sa mga kapitan gamit ang tablet?
Ingna kaha hinuon nga namolitika si Osmeña pinaagi sa pagsanong sa kapritso sa ubang mga kapitan.
Inay galaxy tablet maoy paliton ni Osmeña, mas makatabang tingali og computer sets maoy iyang paliton ug iapud-apod ngadto sa mga tunghaan sa kabukiran aron dunay magamit ang mga tinun-an sa ilang computer class.
Kun himuon kini ni Osmeña siguro masulbad ang suliran sa mga estudyante nga nagtuon og computer lessons apan gamit lang ang mga imaginary computers.
Kun kinsa may nagsugyot ngadto ni Osmeña sa pagpamalit og galaxy tablets siya maoy labing ugok sa tanang ugok nga advisers sa kongresista ug angayan siyang isalikway ni Osmeña.
* * *
- Latest
- Trending
