Mga adik nga paglaum sa nasud

Kaniadtong miaging semana duha ka mga chairman sa SK sa North ug South nga distrito sa dakbayan sa Sugbo ang nasutang tiggamitan og ginadiling drugas atol sa gipahigayong kinalit nga drug test sa dihang nagtigtom ang ilang federasyon. Hinoon ipaubos pa sa confirmatory test sa Police Crime Laboratory ang resulta sa drug test.

Ang kinalit nga drug test sa 56 ka mga SK leaders sa dakbayan sa Sugbo gihimo human makadawat og taho ang ilang federation president nga si Konsehal John Philip Po nga adunay mga SK Chairman sa dakbayan sa Sugbo nga tiggamitan og ginadili nga drugas.

Pagka peligro kun makonpirmar sa Police Crime Laboratory nga adik gayod ang duha ka mga SK Chairman sa North ug South nga distrito sa dakbayan sa Sugbo. Peligro tungod kay gitan-aw sila nga pangulo sa kabatan-onan sa ilang mga barangay ug adunay dako nga inpluwensiya sa ilang mga kaubang batan-on.

Busa akong gipanawagan ang duha ka adik nga SK Chairman dinhi sa dakbayan sa Sugbo sa pagluwat sa ilang katungdanan gumikan kay dili sila haum sa katungdanan nga ilang gihuptan. Mintras tantong sayo pa, kinahanglang malayo na sila sa mga batan-on nga ilang gipangulohan. Kinahanglang malayo ang mga batan-on sa ilang barangay sa ilang dautan nga inpluwensiya.

Pagkaanugon sa mga batan-on nga giingon ni Dr. Jose Rizal nga paglaum sa nasud. Unsaon ba nila pagkapaglaum sa nasud kun sila mga adik na.

Hinoon kining duha ka mga SK Chairman nga nasutang adik dili upod ni nato ikatingala nga mag adik-adik sa panahon sa ilang pangatungdanan tungod kay daghan man usab tang mayor, gobernador, kongresista ug uban pang mga pinili nga opisyal sa nasud nga mga adik, gani ang uban kanila nagpayuhot pa.