Markado

Dili sa tanang higayon husto ang first impression. Labina gyud kun mahimo kang Markado gumikan sa imong sala nga nahimo. Kun kawatan ka pananglitan, kawatan ka na lang gyud hangtud sa hangtud. Mao tingali nga nidaghan ang nabuang ug nidagsang ang buot mohimo og kaugalingon nilang kalibutan aron paglikay sa mapintas nga balighot ning atong kasamtangan. Paet! Karon pa diay ko nga daghan diay ang mas hagip-ot pa kay kang San Pablo ug mas demanding pa kaayo kay kang Kristo.

Dili na pangutana kun kapila ka makasala. Ang pangutana kun kapila ka ba kaha naningkamot nga molahutay diha sa tinguha nga magtarong sa imong pagka-ikaw? O basin imo lang gihimong panagang ang buslot sa uban aron matabonan ang imong kaugalingong kasaypanan? Maot dili ba? Sama gud na sa mga managhigugmaay. Tam-is tagamtamon ang matag gutlo. Wala’y balibad, walay mulo. Ang tanan nindot ug tanlas sination. Apan kun ugaling dunay mas nindot nga moabot, mahimong las-ay ang panagkuyog. Pangitaan lang og tukmang kahigayonan aron makalingkawas gikan sa gipaka-abnormal nga relasyon. Mao nga ang resulta, pangitaon ang kalibutang kaugalingon aron matagamtaman sa daklit ang kahulogan sa nagpinal nga gininhawa. Drama.

Lisud tuod ang paghatag sa pasaylo ug papason ang marka sa matag usa kanato. Kay matud pa ni Neil Strait: “Forgiveness gives a man a new page on which to write his life.”