Dakup nga di mangilkil

Kamong mga tag-iya og sakyanan siguroa nga ang inyong mga units, ilabi na ang mga passenger jeepney, nga duna g’yuy hand brakes. Nakabantay ko nga daghan kaayo nga mga sakyanan walay hand brake.

Unya kamong mga drayber kun walay hand brake ang sakyanan, aw naa ra ninyo kun mo-drive mo pero ayaw pagreklamo pananglit dakpon kamo sa mga law enforcers.

Ang mga LTO enforcers gitahasan sa pagpatuman sa mga lagda nga makatabang pagsiguro sa kaluwasan sa mga sumasakay. Sayonan ka, niadtong miaging Lunes dunay nadakpan nga drayber og PUJ nga nagbiyahean sa Busay.

Ang sakyanan walay hand brake. Wala motingog ang drayber dihang gipangutana sa LTO enforcer kun unsay iyang buhaton kun inigtamak niya sa foot brake mahibaw-an niya nga mibuto na ang rubber cap.

Paniid nako pwerteng daghana g’yud sa mga sakyanan, sagad mga passenger jeepney ug multicab, nga walay mga hand brakes. Kun ako ang makasakop niining maong mga sakyanan dili g’yud ko mopasaylo. Mas maayo pa nga pamultahon ang mga drayber nga nagmaneho sa sakyanan kay sa maaksidente ang mga sakay niini. Ang mga pasahero gud wala na sila masayud nga ang gimaneho nila nga sakyanan dili hitsas sa mga gamit.

Sama nga wala masayud ang mga pasahero nga ang drayber sa gisakyan nilang PUJ nag-sinelas nga posibleng masangit inig-dali-dali nila og brake ug makamugna og aksidente.

Ayaw g’yud tawon mo pag-sinelas nga mag-drive og sakyanan, ilabi na kun mga public utility vehicles kay subra sa P1,000 ang multa ana. Nganong dili man gayud kamo motuman sa lagda?

Duna ko’y gipara nga PUJ nga nagbiyahe sa Lahug kay dihang miagi sa LTO checkpoint wala mag-uniporme. Gadali-dali pagsul-ob sa iyang pinilo pa nga blue uniform.

Unya gipangutana ko sa maong drayber kun kauban ba namo ang iyang higala nga law enforcer. Abi kaha niya og dili na siya dakpon tungod kay may nailhan siya nga among kauban.

Akong balikon nga kun motuman lang g’yud ang mga drayber sa balaud wala g’yuy problema. Apan sagdi lang, kun ang LTO Task Force Alpha ang modakop kaninyo dili man sab mo kilkilan.

Kining amo, serbisyo ra g’yud nga kun may makahimo og salaud isyuhan og TOP nga wala nay daghang estorya, dili sama sa ubang mananakop nga mohana-dayon og kangkang ang kamot.

* * *

Nasubo kaayo ko dihang gisuginlan sa akong kauban sa The Freeman nga may mga sakop sa CITOM nga magsakay og patrol vehicle nga kusog kaayong mangilkil og mga drayber nga gikang mangompra sa Carbon.

Usa ka higayon diha g’yud gipahunong atubangan sa The Freeman ang usa ka multicab nga gikargahan og mga pinalit gikan sa Carbon. Ang among kauban diha nagtindog sa ibabaw sa hagdan. Pagduol sa usa ka traffic enforcer nga gikan sa CITOM vehicle, kit-an g’yud sa among kauban nga gihatagan og P100. Aw sibat diritso ang CITOM nga wala na dakpa ang drayber.

Bi, nganong gipara man kadto nga drayber unya misirit man dayon nga wala isyuhi og TOP o kaha citation ticket? Nasubo ko pagsulti kanako sa akong kauban sa The Freeman kay lain kini nga makapaubos sa pagtan-aw sa mga drayber sa CITOM.

Hagit ngadto ni Atty. Raffy Yap nga panid-i kanunay ang imong mga sakop Sir. Dili man kinahanglan nga sunod-sunoron sila ba.