Stock market: Barometro sa performance ni PNoy

“The bullish local stock market is a good barometer on how the Aquino administration should be judged,” matud ni Chairman Jose T. Pardo sa Philippine Stock Exchange. Sa ato pa, tungod kay mitaas man ang stock market, ug gipaabot nga magpabiling taas sulod ning tuig 2011, nagpasabot nga maayo ang performance ni Noynoy.

“The stock market is the barometer of economic confidence. There is nothing more to say because the stock market has spoken and risen beyond expectation. The best way to grade the Aquino administration’s performance is to show proof and the stock market has shown proof,” padayon ni Pardo. Ikaw, Dro, unsa may imong proof nga miingon ka man nga failure ang Aquino administration?

* * *

Di ko mo-touch sa SONA ni Noynoy. Kamo lang kay ang opinion for or against sa SONA, mag-agad kun amigo o imo bang kontra si Noynoy. Sa ato pa, dili ma-objective ang mga opinion.

Kun kontra ka, natural, ngil-ad, bati, walay direction, ug walay unod ang SONA. Kun imong amigo, moingon sad ka nga maayo, nindot, dunay direction ug undanon kaayo.

All of a sudden, ang mga radio commentators, mga columnists, nahimong mga SONA experts. Sila ra ang husto. Mao nga di na lang ko moapil. Kamo na lang, Dro!

* * *

No permit, no exams. Mao ni ang policy karon sa atong mga tunghaan, ilabina sa mga exclusive schools kon kining mga tunghaan alang sa mga rich. Walay permit kun di ka kabayad sa tuition, ug dili ka kakuha sa exam, midterm o final. Haskang paita!

Ang House Bill 4791 nga mipasar na sa third ug final reading, sa ato pa, balaud na, nagdili na niining maong policy nga “no permit, no exam policy” sa mga tunghaan. Sa ato pa, maka-take gihapon ka sa exams bisag di pa ka kabayad sa tuition in a particular period.

Hinoon, ang hingtungdang mga estudyante kinahanglan mobayad sa accumulated nga bayranan, with interest. Ug kadtong di kabayad in full at the end of the schoolyear, dili ma-release ang grado.

Hinumdom ko nga nakaeskwela man ko sa UV, daghan ming maglinya sa opisina ni Dean Gonzales panahon sa ting-exam, kay mangayog permit aron maka-take sa exam, kay lagi wa pay ibayad sa tuition. Niining bahina, lenient kaayo ang UV. Nagduda gani ko nga hangtud karon, lagmit duna pa koy utang sa UV. Hinoon didto man ko graduate sa Xavier University sa Cagayan de Oro City. Ug matag bakasyon mouli ko, ug mo-summer sa UV. Mao nga may pagka-Visayanian sad ko.