Mata’g usa nato ang dunay katungod nga angayang panalipdan gikan ni bisan kinsa ug sa bisan unsa nga momalmal niini. Kabahin sa mga mahinungdanong katungod sa tawo mao ang katungod nga magmalipayon. Kay katungod man, atong panalipdan, lipangon ug puy-an.
Tataw kaayo nga daghan kanato ang nanlimbasog aron lamang makuha nato ang atong gusto ug atong gipakigbisogan ang bisan unsa nga gituohan nato nga magdala nato og tinud-anay nga kalipay bisan pa man kun kini nagkahulogan og pagbiya sa naandang han-ay sa pagkinabuhi.
Ug sa akong mga propesor kaniadto sa seminaryo ang human migawas sa pagkapari ang wala gyud mohimo og pagbiya sa gawas nasud aron makalikay sa mga tabi-tabi.
Hinunoa, mosimba gihapon siya, magdula og tennis, moduaw sa seminaryo kuyog sa iyang anak, makigtabi kanamong iyang mga estudyante.
Sa laktod, wala siya’y kahadlok ni reservations sa mga nahitabo. Nalipay lang pud ko nga nagsud-ong kaniya nga malipayon sa iyang desisyon bisan pa man sa mga higayon nga siya supakon tingali sa kadaghanan sa kapasikaran nga kaniya gisayangan. Kay sa magpabilin sa ministeryo nga wala na diay bisan kudlit sa kalipay. Dili ba miserable?
Buhata ang bisan unsa nga giisip mong makadugang sa imong kinabuhi apan timan-i pud nga sa imong paghimo niini dili ikaw makahatag og kadaut sa uban. Tinuod dunay kagawasan apan dili baya ni absolute.
Mao nga higala hatagi’g pokus ang imong kaugalingon karon. Ang kalipay wala magpasabot og kawalay suliran hinunoa nga bisan anaa ang maong mga suliran, aduna kay kagawasan nga mopahiyom taliwala sa mga panghitabo sa imong kinabuhi.