Paka-ulaw sa Sugbo

Dako akong pagduda nga adunay mga “interest individuals” nga nagpaluyo sa pagpaka-ulaw ni Bobby Joseph kang Tourism Secretary Albert Lim dinhi sa Sugbo atol sa Meetings, Incentives, Conventions and Exhibitions/Events Conference (MiceCon) 2011 sa Cebu International Convention Center.

Sa gibuhat ni Joseph, dili si Lim lamang ang naulawan sa iyang pag-awhag kang Lim ug sa regional director sa Department of Tourism si Rowena Ylaya Montecillo pag-resign.

Ang labaw’ng naulawan sa gibuhat ni Joseph mao ang mga organizers sa MiceCon 2011 ug ang Sugbo mismo.

Nganong gi-atol man ni Joseph sa MiceCon ang pagpa-interview sa mga sakop sa media pagpa-resign kang Lim?

Nganong gi-atol man ni Joseph nga dinhi sa Sugbo paka-ulawan si Lim?

Ang akong punto mao nga sa sinugdanan pa man sa paglingkod ni Lim giduso kining “Open Skies” policy nga maoy gihimong rason ni Joseph pagpa-resign sa kalihim sa turismo.

Kining Open Skies policy gikasakit pag-ayo sa atong mga local airlines. Gikahadlok sa mga local airlines mao ang pagpanghawod unya sa mga foreign airlines kun ipatuman ang Open Skies policy.

Hasta ko dili usab uyon niining maong palisiya. Siyempre, isip Pilipino, mas mopabor ko nga ang local airlines ang manghawod dinhi sa nasud. Kay kun Open Sky ang palisiya sa Pilipinas, hasta ang mga langyaw mahimo na nga makadiktar sa atong airline industry. Dili ko ganahan niini.

Pareho kami og feelings ni Mr. Joseph nga kun tugotan ang mga foreign airlines nga makadiktar sa atong airline industry, basin momahal ang mga pletehan sa eroplano.

Apan aduna koy gamay nga pagtuo nga bisan wala kining mga langyaw, ang mga higante gihapon sa airline industry gihapon ang nagdiktar sa plete.

Sumala pa gud sa dihang ang Philippine Airlines pa ang flag carrier sa nasud, barato ba ang plete sa eroplano?

Karon na lang nga medyo maabot na sa bulsa sa mga yanong Pilipino sama nako ang plete sa eroplano nga ang Cebu Pacific na ang nanghawod. Gani, ang Cebu Pacific na ang paboritong eroplano sa mga biyahedor. Pero, balikbalikon nato sa pagpangutana si Joseph, unsa may nakaon niya nganong iya man gi-atol nga guest speaker si Sec. Lim sa MiceCon ug dinhi pa gyud sa Sugbo sa iyang pagpaka-ulaw.

Tingale moingon ang uban nga dili man to pagpaka-ulaw ang iya kay lehitimo man kadto nga panawagan. Bitaw lehitimo nga panawagan apan anaa sa sayop nga lugar ug sa sayop nga higayon.

Daghang mga bisita gikan sa Estados Unidos, Australia, Singapore ug Thailand nga dinhi sa Sugbo alang sa MiceCon nga nakasaksi unsa kawalay batasan ni Joseph.

Ang wala nato malikayi, naulaw kita sa mga bisita tungod sa gibuhat ni Joseph.

Maayong pangutan-on si Joseph kun kinsay nagsugo niya.

Dili ba kaha si Lucio Tan?

* * *

Si kanhi Presidente Fidel Ramos na ang mitingog paghatag og “warning” sa Malacañang niining paggukod nilang kanhi presidente Gloria Arroyo ug mga personalidad sa miaging administrasyon.

Matud pa ni El Tabaco nga ang “with hunt” sa mga personalidad sa miaging administrasyon nakapahadlok sa mga foreign investors sa nasud. Kun ako’y President Noynoy Aquino, dili nako himuong rason ang warning ni Ramos sa paghunong sa mga pagpang-utingkay sa mga anomaliya sa Arroyo administration. Apan maayo tingaleng i-temper lang kini, nga sa ato pa, hinay-hinayan lang aron dili makahatag og dautan nga resulta, ilabi na sa ekonomiya.

Makaayo man sa political system ang ingon niining polisiya sa gobyerno. Maayo man gani, kining i-institutionalize nga sa matag administrasyon, aduna gyuy commission nga mo-utingkay sa mga binuang sa “immediate past administration” aron wala na gyu’y administrasyon nga magbinuang.

Apan kun aduna nay personalidad nga gitumong sa pagpanggukod, dili na usab kana mao.

Dili ko motuo nga niining administrasyon ni Noynoy Aquino walay mga binuang. Gani, usa sa atong gitutokan ang mga binuang sa National Food Authority (NFA) tungod kay dinhi gibalhin ni Noynoy ang rice importation.

Gani, kanang panag-ilog sa posisyon sa Balay Group ni DOTC Secretary Mar Roxas ug sa Samar Group nilang Executive Secretary Paquito Ochoa ug Bise Presidente Jejomar Binay tungod kana sa panag-ilog og puwesto asa sila makahimo og tinagotago nga binuang.

Busa, mangandam na lamang usab sila nga sa sunod administrasyon, sila na usab ang gukoron.

* * *

Malampuson ang gihimong 2nd Vicente Sotto Medical Center Chief Funshoot 2011 sa Kamagong Gun Club sulod sa Camp Lapulapu.

Sa maong funshoot, ang mga doktor, nars, ug mga kawani sa VSMMC gihatagan og gun safety seminar sa direktor sa Kamagong nga si Dr. Tyron Mercader.

Si Nonoy Mongaya, PIO sa VSMMC nagkanayon nga magpadayon kining maong kalihukan pinaagi sa ilang grupo nga gitawag og VSMMC Rifle and Gun Enthusiasts (R.A.G.E.)

Si Dr. Gerry Aquino maoy chief karon sa VSMMC, mihimo sa inaugural shoot ginamit ang Thompson.

Congratulations, mga kahigalaan ko diha sa VSMMC!