EDITORYAL - Ang income sa sugarol

Hayahaya diay nianang makadaog sa lotto o sweepstakes no kay wa man diay nay bayranan sa buhis.

Ang mga kawani, bisan unsa kagamay sa imong suweldo di gyud ka kalikay sa buhis aron makahipos og kuwarta ang panudlanan sa gobyerno     alang sa mga proyekto niini nga gikinahanglan sa nasud.

Usahay makapangutana ka kun tinuod nga nagkinahanglan ang   gobyerno og limpyong buhis gikan sa kinitaan sa matag Pilipino gawas niadtong gihatagan og exemption, unsa man nang daug sa lotto ug sweepstakes, di na kinitaan?

Kana man gani unta ang angayang kuhaan og  dagkong buhis kay kuwarta kana sa hangin nga di hinagoan sa nakadaog, ilabi na kun usa lang ka tiket ang imong gipalit unya midaog og tagpila ka milyon ka pesos , unsa may kahago nga imong gihalad diha.

Baya pa ba , ang nanarbaho sa pribado ug publikong trabahoan bisan maglisud ka na sa pagpalit og purol pugson gyud ka sa pagbayad og buhis kay lagi, sagrado kining katungdanan kutob sa mga Pilipino   nga may income.

Mahalinan ka og yuta, hayop, ug bisan unsay makuwartahan nimo, tungod kay usa ka Pilipino di gyud ka makalikay sa pagbayad og tukmang buhis sa gobyerno. Ang mga abogado, doctor , engineer ug uban pang professional, labaw sa tanan ang mga negosyante    pabayron gyud og buhis sa kinitaan nilang naggikan sa ilang abilidad ug propesyon ug sa negosyo.

Di kaha ni maoy hinungdan nga daghang mga propesyonal ug mga negosyante ang di magtinarong pagbayad    sa ilang buhis kay aduna may gipalabi ang gobyerno sa pagtubag sa maong katungdanan?

Kun ang gihimong pangatarungan sa mga magbabalaod nga sugarol, nga tungod kay ang maong   income matawag nga “income by chance” o kinitaan nga gumikan    lang sa suwerte, oh di mas labi  untang pangayoan og buhis sa gobyerno kay gaan kaayong gikita sa usa ka tawo ang maong   income busa way sakit sa tiyan ug konsensya sa mikita niini? Di ba?