EDITORYAL - Ang panurambaw di maayo

Di baya maayo nga ang mga opisyal sa kagamhanan sa usa ka lugar di masayud sa tinuod nga panghitabo o kaha mga kalihokang illegal sa ilang mga molupyo.

Sama sa nahitabo sa dakbayan sa Talisay diin si Vice Mayor Alan Bucao nahingangha  human hisakpi sa kapolisan sa usa ka internetan ang tulo ka mga babayeng nag-cybersex.

Ang Talisay tinuod usa sa gipabantayan   sa kapolisan sa lalawigan nga nagpadagan og cybersex, sama sa Cordova, Lapulapu City , Cebu City ug Mandaue City.

Kun ang kapolisan may kasayoran bahin niining mga buhata mas maayong ipahibawo nila sa mayor ug sa bise mayor buwahan to kun pangutan-on sa taga media ang maong mga opisyal, may ikatubag sila. 

Ang usa sa labing maayong ikapahibawo  sa maong mga opisyal sa katawhan , mao nga kaabag sila sa kapolisan sa pagpakgang sa dautang mga kalihokan sa ilang mga negosyante.

Ang nakapait man gud sama sa gireklamo ni Vice Mayor Bucao nga sa nasakpang internetan nga nagpa-cybersex, nahingangha nalang siya dihang migawas sa Banat News ang maong balita nga wa siya’y kasayoran kay wa man siya estoryahe daan sa kapolisan bahin sa ilang operasyon.

Matawag baya nga usa ka panurambaw ang maong hitabo nga murag adunay buot ipasabot   ang kapolisan nga gusto lang nga silay daygon sa ilang hepe, samtang ang mga kadagkoan sa dakbayan nga ilang gisilbihan murag gusto nilang sama sa bota nga mahangangha lang ug way ika-estorya ngadto sa mangutana kanila.

Kun ibutang ta si Chief Insp. Eddie Recamara maoy diha sa dapit ni VM Bucao o kaha sa dapit ni Mayor Soc Fernandez, unsa may iyang bation kun pangutan-on siya sa katawhan o taga media, bahin sa butang nga gihimo sa iyang kapolisan nga wa niya hisayri.

Igo lang siyang moingon nga …“mao ba?” ngano wa man ko pahibaw-a sa akong mga tawo? Di ba?