Tabang President Noy!

Atensyon mga tag-iya og sakyanang pasaheroan! Angay na g’yud tingali nga tagdon ninyo ang inyong mga sakyanan karong panahona aron dili kamo mahiagum og dagku kaayong multa kun masakpan sa inyong pagpasagad.

Ang Land Transportation Franchising and Regulatory Board (LTFRB) naghulma na g’yud og team sa mga enforcers nga mohimo’g kampanya batok sa mga sakyanan nga ang mga tag-iya wala makatuman sa gilatid nga lagda.

Mora’g nalipay ko niining maong kalamboan kay gawas sa Land Transportation Office (LTO) duna nay mga sakop sa LTFRB nga mohimo og buwag nga kampanya. Basi sa dukomento nga gitugyan kanako ni LTFRB-7 regional direktor Ahmed Cuizon, pwerteng dagkoa ra ba sa multa.

Aw, angay usab tingali nga patilawon og multa ang mga tag-iya sa sakyanan kay kang-kang lang ang ilang palad nga modawat sa abang apan gipasagdan ra ang ilang mga sakyanan nga walay kompleto nga kahimanan, ilabi na ang mga suga.

Kining maong pagmugna og LTFRB law enforcement team proyekto kini ni Sir Ahmed kay kaniadto gud kun dunay moreklamo sa LTFRB batok sa mga sakyanan, wala g’yuy mohimo og aksyon.

Unya, pahibaw-on nako ang mga tag-iya og sakyanang pasaheroan nga illegal ang pagbutang ninyo og “advertisement” sa inyong mga sakyanan kun wala kamo’y permit gikan sa LTFRB.

Nabantayan nako nga dunay mga passenger jeep nga nagdagan-dagan nga walay “hand brake.” Pastilan, ang mga drayber usab nagmika lang, wala makatug-an sa tag-iya nga kalapasan sa balaud ang pagpadagan og sakyanan nga walay hand brake.

Kamong mga operator og public utility vehicles susiha g’yud ninyo kanunay ang inyong mga sakyanan inig-abut sa grahe sa gabii kun nagsiga pa ba ang suga. Pastilan, mas maayo pa man ang akong sakyanan nga karaan kay nagsiga pa ang suga.

Unya, usba ninyo ang estelo sa koneksyon sa suga sa inyong sakyanan. Kinahanglan nga inigpasiga sa headlight dungan nga mosiga ang tail light kun suga sa luyo. Ang uban gud nga sakyanan buwag ang switch sa headlight ug tail light.

Kini maoy rason nga ang ubang drayber nga dili gani makasabot og “tail light” dili na lang mopasiga sa suga.

* * *

Ang tagdumala sa Tapilon Rural Waterworks and Sanitation Association (TARWASA) diha sa barangay Tapilon, Daanbantayan nangayo na karon og tabang ni Presidente Aquino aron masulbad na ang panagsungi nila ug sa mga opisyal sa lungsod.

Gipasanginlan ni TARWASA chairman Claro Benatiro ang mga opisyal sa Daanbantayan nga gipangulohan ni Mayor Ma. Luisa Loot nga mihimo og pagpangabuso sa ilang katungdanan batok sa ilang proyekto sa patubig sa Tapilon.

Si mayor Loot ug ang ubang mga opisyal mimando man sa TARWASA nga mohunong sa ilang pagpangolekta og bayad gikan sa mga konsumidor kay matud pa wala kini permit gikan sa lungsod ingon man sa Local Water Utilities Administration.

Basi sa rekord, ang Regional Trial Court (RTC) sa Bogo miluwat og kamandoan ngadto sa lungsod sa Daanbantayan nga dili usa sila mohimo’g lakang batok sa TARWASA mentras ang isyu husayon pa sa hukmanan.

Apan wala manumbaling si Mayor Loot kay gipatak-opan g’yud niya ang TARWASA apan dunay order ang korte nga “status quo” kon ibalik usa sa naandan nga sitwasyon sa dili pa masulbad sa hingpit ang isyu sa hukmanan.