Kun tinuod man nga usa ka maestra diha sa Pasil Elementary School wala mopasulod sa iyang tinun-an tungod lang kay wala makadala sa gi-require nga project daku kining sayop ug wala itugot sa Department of Education. Dili lang nako ilhon ang ngalan sa maestra nga gireport ni Mario Lopez nga tigpaminaw sa DYLA ug maoy mipadangat sa reklamo sa mga ginikanan sa bata. Gitawgan dayon nako si Dr. Rhea Mar Angtud, ang superintendent of public schools dinhi sa dakbayan ug gitataw niya nga daku kining sayop.
Kun ang bata dili makatuman sa gi-require nga project sa maestra angay’ng pasudlon gihapon kini sa classroom apan ayaw lang hatagi og grado. Pero nganong wala man usab kini makadala og project nga tanom? Kamo usab nga mga ginikanan kasayon ra ana nga project unya nganong wala man makadala ang inyong anak?
Diri gani sa Lahug nga ang project sa mga maestra mao ang paghimo og balay-balay. Nabuntagan man gani mi og tabang sa bata nga makahimo sa iyang project. Tabangan g’yud nato ang atong kabataan aron paghatag og kasayon kanila ilabi na kun lisud kaayo ang project.
Apan matud ni Dr. Angtud nga kun may gihimo ang maestra nga tan-aw ninyo dili na g’yud maayo, ipadangat usa kini ngadto sa prinsipal kay basin og ang bata mipauli ra nga iyang kagustohan kay mauwaw nga wala siya’y project.
Salamat kaayo ni Dr. Angtud nga abtik kaayong motubag sa atong mga panginahanglan.
* * *
Uy, pagkadalaygon gud sa mga kawani sa Cremdec, usa ka departamento sa City Hall nga mitabang sa mga igsoon nato sa kabukiran bisan sa pagbayad sa ilang kuryente, pag-file sa ilang applications sa National Statistics Office ug uban pa.
Matud ni Allan Bautista nga maoy hepe sa Cremdec kon City Resource Management and Development Center, nga libre ra g’yud ang ilang serbisyo gawas sa naandan nila nga trabaho.
Tua man gud magbasi sa barangay Taptap (sa bukid) ang mga sakop sa Cremdec mao nga kay matag adlaw duna man sila’y mga sakop nga mag-arian sa siyudad mata’g adlaw mao nga nagdistino na lang siya og liaison officer.
Aw kun tinuod ang giingon ni Allan Bautista nga dili g’yud sila modawat og bayad bisan og tunolan pa sila og pahalipay, mobalik-balik ko pagsaludo kanila. Apan kun dili gani tinuod sawayon nako siya.
* * *
Mas dugay ang paghatag karon sa incentive nga tag P4,000 sa mga senior citizens dinhi sa dakbayan sa Sugbo kun itandi sa miaging tuig kay duna may kakulian nga angayang korehean.
Sayonan ka ba gud nga tungod sa pagdali-dali og paghatag sa mga incentive sa miaging tuig ilabi na kay nagkaduol na man ang eleksyon adtong higayona, may kapin sa mga incentives nga alang sa 100 ka senior citizens nga nakobra bisan patay na ang beneficiaries.
Mao kana ang rason ngano nga giestrikto na pag-ayo karon ang pagpanghatag sa mga incentives sa mga senior citizens.
Kining makadawat og incentives karong buwana nga dul-an sa 2,000 mao kini ang wala makadawat sa miaging tuig. Ang para karong tuiga ambut og mahinayon ba nga mahatagan karong buwana, basin Agosto na.
Kun may mga reklamo kamo nga naglambigit og public interest, suwata. Dili lang nako ihatag ang akong numero sa cellphone kay daghang samokan nga magbinuang.