Sa ikaduhang higayon, nakapalusot na usab og warrant of arrest ang korte batok sa ikaduhang parisan sa mga suspetsadong midagit ug mipatay kang Ellah Joy Pique, ang 6 anyos nga bata nga taga Jaclupan, Minglanilla.
Ang unang parisan nga gisikop sa kapolisan ug gipapriso sulod sa pipila ka adlaw, nakakalas sa katungdanan sa usa ka hepe sa kapolisan sa lalawigan gumikan sa dinali-dali nga lakang niini pagduot sa dinakpan luyo sa kakuwang sa mga ebidensya batok kanila.
Apan kining ikaduhang parisan, naluwatan na usab og warrant of arrest ug ning tungora sa paggama ning maong editorial dakponon pa, apan lig-on ang paglaum sa kapolisan nga lahi na kini sa unang parisan.
Tinuod sa kabatid ug kahanas sa intelligence group sa kapolisan sa lalawigan sa Sugbo sa pagsulbad og mga krimen nga dinagko, imposibli kaayo nga di masulbad ang maong krimen.
Ning tungora manghinaot ang publiko nga malampuson ang kapolisan ning maong kaso ug wala na untay katungdanan nga mapagan pa.
Ang kamatayon sa inosenteng bata sa mga kamot sa midagit kaniya di angay katulgan sa mga otoridad gumikan sa kapintas sa maong krimen.
Kay kun mapasagdan ang kriminal nga di kapahamtangan sa labing bug-at nga silot nga angayang matagamtaman nila katumbas sa kasakit sa kamatayon sa biktima, may posibilidad pa nga makabiktima pa sila og laing mga bata sa umaabot nga panahon.
Apan labaw sa tanan, ang pag-amping sa mga ginikanan sa ilang mga anak maoy nag-unang yawe aron kalikayan ang susamang panghitabo ilabi na karong may mga kapanaminan na ang tanan.
Usahay gumikan sa kakompiyansa, inigka-disgrasya na, daghan na kaayong sakop sa katilingban nga maangin, apan kun sutaon naggikan ra usahay sa kadanghag sa mga hingtungdan. Di ba?