Abiba sa CBCP

Sa labing unang higayon, ang Catholic Bishops Conference of the Philippines (CBCP) nangayo og pasaylo sa publiko alang sa mga obispo nga nangayo ug nanawat og luho nga mga sakyanan gikan sa Philippine Charity Sweepstakes Office (PCSO) atol sa pamunoan ni kanhi presidente Gloria Arroyo.

Apan klarong nanagana ang CBCP pag-angkon og kasaypanan.Ni sa pag-detalye unsay kasaypanan nga nahimo sa mga obispo.Sa sinuwat nga pamahayag nga gibasa sa gumagawas nga presidente nga si Obispo Nereo Odchimar, ang CBCP igo lang nipasabot nga nangayo sila og pasaylo tungod sa kalibog nga napahamtang nila sa katawhan kay nisukwahi sa ilang mga wali ang mga binuhatan sa pipila sa ilang kaubanan.

* * *

Nagdumili si Odchimar pagpanubag og mga pangutana maong wa mapatin-aw unsa ang ilang mga wali nga nasukwahi sa unsa nga mga binuhatan ni kinsa nga mga obispo. Wa sab makahatag og dugang kasayuran sa pagsaad sa CBCP nga sublion ang ilang pakiglambigit sa nagkalainlaing mga buhatan sa gobyerno.

Inabogado na ang mosunod nga bahin sa pamahayag sa CBCP:Andam ang hingtungdan nga mga obispo sa pagpanubag sa responsibilidad kun mapamatud-an nga nahisupak sa mga balaod ang ilang pagpangayo ug pagpanawat og sports utility vehicles (SUVs) gikan sa PCSO ug ubang mga pabor gikan sa gobyerno.

* * *

Kay hanig nang daan sa depensa sa mga obispo.Nga ang SUVs nga gikan sa PCSO wa nila gamita alang sa personal nga katuyoan.Kun dili alang sa pagtabang sa labing masakiton ug labing kabos nilang mga parokyano sa labing hilit nga mga bahin sa ilang mga diyosesis.

Nga mahimong makalusot apan lisod kalawaton.Labi na sa kaso ni Butuan Bishop Juan de Dios Pueblos nga nangayo og brand new nga 4x4 nga awto.Kay kun paghatag pa og transportasyon sa katawhan ang katuyoan, ang P1.7 milyones nga gihatag sa PCSO gipamalit unta og 28 ka multicab, inay Mitsubishi Montero.

* * *

Apan nalipay gihapon ko sa pamahayag sa CBCP. Kay nalikayan sa mga obispo ang dakong tentasyon sa hingpit nga pagdupa sa pakauwaw nilang Pueblos ug kaubanan.Kay may sukaranan ang mga hulhog nga, sama sa nangaging mga eskandalo, maayo lang ni sa sugod apan di gihapon makalahutay ang bisan unsang ipasakang mga kaso batok sa mga obispo.

Timaan ni nga nidaog ang mga obispo nga nauwaw, batok sa pipila ka gikublan ug nagpapating na, sa kontrobersiya nga nahiagoman sa ilang kaubanan.Napatigbabaw ang ilang argumento nga inay pasagdan nga maduhig ang Simbahang Katoliko sa pagpabadlong sa pipila ka obispo, mas makiangayon nga mobarog ang CBCP alang sa katarong.Bahala na kun di nila masabonan ang badlungon nilang mga sakop atubangan sa na-eskandalo nila nga mga parokyano.

* * *

Email: [email protected].