Di pa lang dugay may gipatay nga sakop sa Kuratong Baleleng ug sakop sa iyang pamilya sa dakbayan sa Lapu-lapu. Wa pa gani masulbad ang nahisgutang krimin may amang na usab nga gipatay, may lain pang duha ka mga babaye nga gipatay sa managlahing dapit ug adlaw ug mga taxi drivers nga gipangtulis ug gipangpatay. Wa pa ni labot sa illegal nga drugas nga ladlaran nga gipamaligya sa pipila ka mga dapit sa dakbayan sa Lapu-lapu.
Ang krimin sa Lapu-lapu misiaw pagmaayo human mahimong hepe sa kapolisan sa nahisgotang dakbayan si Sr. Supt. Anthony Obenza. Tungod sa pagdumala ni Obenza sa kapolisan sa Lapu-lapu natay-og ang seguridad sa mga Oponganon. Di na ka makaseguro sa imong kaugalingon kun luwas ka pa ba nga magsuroy-suroy sa kadalanan ug kun luwas ka pa ba bisan mismo sa sulod sa imong pinuy-anan.
Si Mayor Paz Radaza nga gipangayoan og pamahayag sa performance ni Obenza midupa ug nanalipod sa hepe sa kapolisan sa iyang dakbayan. Mga pagsuway lamang kuno sa liderato ni Obenza ang nahitabo nga krimin sa dakbayan sa Lapu-lapu. Pagkapeligro! Pagkalooy ni Opong.
Ang krimin sa Lapu-lapu misiaw tungod kay gawasnon nga makasuroy-suroy sa nahisgutang dakbayan ang mga kriminal kay wala man sila pangitaa sa mga polis.
.* * *
Gitambongan sa gibana-banang napulo kapin ka libo ka mga Sugbuanon ang State of the City Address ni Mayor Michael Rama nga iyang gipadangat kaniadtong unang adlaw ning buwan sa Hulyo. Kauban sa mga mitambong sa SOCA sa mayor mao ang mayoriya sa mga konsehal sa dakbayan sa Sugbo pinangulohan ni Bise Mayor Joy Young.
Sa iyang State of the City Address giladlad sa mayor ang iyang mga nahimo sa unang tuig sa iyang pagka mayor ug ang iyang plano alang sa umaabot pang duha ka tuig sa iyang termino.