Mga obserbasyon sa TV
Dili pa lang dugay nakadawat kita og listahan sa mga obserbasyon sa usa ka magbabasa nga wa magpaila. Ang maong listahan pinirmahan lang og “Imong Reader.”
* * *
Ang mga obserbasyon sa maong “Reader” gibasi sa iyang nakita ug nadungog sa TV ug ang pipila niini tugoti nga atong ipaambit kaninyo.
* * *
Obserbasyon 1 -- “Daghan sa mga pobreng tawo nga interbiyohon sa mga reporter sa TV mga pangag ... Ang uban wala gyuy ngipon. Ngil-ad tan-awon ... Ug kun ako pay natungnan ako gyong ikiha ang tv station.”
* * *
Obserbasyon 2 -- “Kadaghanan sa mga Bisaya dinhi sa Bisayas ug didto sa Mindanao magtinagalog gyud kun interbiyohon sa TV. Kini bisan wa nganhi, wa ngadto ang ilang Tinagalog. Nganong dili man lang Binisaya-on ang tubag aron dili maglisud-lisud ug mahimo na nuon nga kataw-anan? Bahala na ang reporter mag-translate.”
* * *
Obserbasyon 3 -- “Naay usa ka artistang babaye nga Bisaya kaayo sa tanan apan dili gyud mosulti’g Binisaya sa TV. Dili siya parehas ni Inday Pilita nga proud kaayo sa iyang pagkabisaya.”
* * *
Obserbasyon 4 -- “Sa mga drama sa tv ug radyo basta naay sakop sa cast nga nagdala sa papel nga muchacha kun sulugoon, Binisaya dayon ang ipasulti niini ngano dili man Ilocano o Bicolano?”
* * *
TRIVIA -- Pahalipay ngadto sa mga opisyales ug katawhan sa Lapu-Lapu City atol sa inagurasyon sa ilang Hoops Dome.
- Latest
- Trending
