Tinuod nga SOCA

Ambot tungod ba lang sa kakuwang sa mas mahinungdanon ug mas dinalian nga hisgutanan, o tungod ba lang kay bag-o pa lang nideklarar og gubat si Cebu City Mayor Mike Rama batok ni Kongresista Tommy Osmeña ug sa Bando Osmeña-Pundok Kauswagan (BO-PK), o tungod sa pag-isnab sa kinabag-an sa mga konsehal sa kalihokan, gipaburot pag-ayo ang importansiya sa state of the city address (SOCA).

Apan nahibawo nang daan ang mga Sugbuanon unsay nahimo ug wa mahimo ni Rama sa unang tuig sa iyang pamunoan. Ug ang katakos, o kakuwang og katakos, ni Rama sa pagdiskurso di makausab sa ilang grado pasar, hagbong, o paghatag og dugang higayon.

* * *

Hingpit nga gipangandaman ug giisip nga mahinungdanong gimbuhaton sa buhatan ni Rama ang iyang SOCA. Nga pipila sa iyang mga sinaligan wa kapugong sa ilang kaugalingon pagtug-an sa tinagoan unta nga mga detalye:

l 15-20 ka gutlo ra ang diskurso (pagpahilom tingali sa mga panaway sa naglibutlibot ug way kahumanan nga estilo ni Rama sa pagluwat og mga pamahayag, apan daghan nagduda nga ang gitakdang panahon mahurot na sa intro pa lang); ug

l Lunlon Binisaya ang pakigpung (pagpahinumdom tingali sa mga Sugbuanon kinsay tinuoray nga larino sa ilang dila, kay si Osmeña yungit pa man nga mo-Binisaya hangtod karon).

* * *

Kun nagtuo si Rama nga ang kinabag-an sa mga Sugbuanon makapaminaw sa iyang SOCA, amo siyang pahinumdoman sa mosunod:

l Sa alas-4 sa hapon, nga maoy gitakdang pagsugod sa iyang SOCA, sa Hulyo 1, nga adlaw’ng Biyernes ug busa tingtrabaho ug tingklase, mga kawani ra sa City Hall ang makaadto sa Plaza Sugbu ug makapaminaw sa live coverage sa mga estasyon sa radyo; ug

l Ang pipila nga makahigayon pagbasa sa iyang SOCA sa mga pamantalaan inigka ugma di makalikay pagtandi ini sa aktuwal nilang nakita nga mga libaong, niawas nga mga kanal, wa makolektang mga basura ug wa matambali nga mga masakiton.

* * *

Sa ato pa, dakong usik sa panahon ang lalis unsay mas tukma nga pahigayonan sa SOCA (session hall ba sa Sangguniang Panlungsod nga gipanindot pag-ayong Rama sa siya pa ang bise mayor), o kanus-a (sa Hulyo 1 ba o sa sunod nga regular nga sesyon sa Hulyo 6), o tambongan ba sa mga konsehal ug ni Bise Mayor Joy Young ug Kongresista Osmeña o dili, dakong usik sa panahon.

Mas mapuslanon alang nilang Rama ug sa iyang mga kaalyado ug mga kaatbang sa politika nga paminawon ug tumanon ang mas sipa ug mahinungdanon ug mas dinalian nga mensahe gikan sa mga magbubuhis: Ang pagpanglulho aron pagtuman sa ilang mga gimbuhaton (1) paghatod sa batakang mga pangalagad ngadto sa labing daghan ug (2) pagpatuman sa balaod bisan kinsay hingtungdan ug maig- an.

* * *

Email: [email protected]