Konseho nga hiniktan

Gipanghambog ni Bise Mayor Joy Young nga dili tota sa mayor ang konseho sa dakbayan sa Sugbo. Seguro mao kini ang hinungdan nga ilang gisupak-supak ang kagustohan ni Mayor Mike Rama.

Kay lagi dili sila tota sa mayor, wa tungaha sa mga konsehal gawas lang kang Konsehal Leah Japson ang imbitasyon sa mayor sa kasaulogan sa adlaw’ng natawhan sa atong nasudnong bayani nga si Dr. Jose P. Rizal.

Kay lagi dili sila tota sa mayor, ila pang papaabuton si Mayor Mike Rama sa ilang imbitasyon sa ila unya nga inagural sesyon sa konseho karong Hulyo uno kay murag wala silay laraw nga ilang pahatagon ang mayor sa iyang State of the City Address sa ilang atubangan kay dili na seguro sila karon nga ganahan.

Sa akong nakita karon sa konseho sa dakbayan sa Sugbo makaingon ko nga makapanghambog gayud si Bise Mayor Joy Young sa pagka independente sa konseho nga iyang gipangulohan kay sa pagkatinuod wa man gyod siya magpagawong ni Mayor Mike Rama. Wala pa man ugod makalighot si Joy Young sa pisi nga gihigot ni Tomas Osmeña sa iyang tiil ug liog.

Ang konseho nga gipangulohan ni Bise Mayor Joy Young dili tota ni Mayor Mike Rama kay hangtod karon tota man gihapon sila ni Tomas Osmeña.

* * *

Ako diay nga pasalamatan ang mga sakop sa New Generation Against Drug and Corruption (NEWGAD) ug mga tinun-an sa Southwestern University nga misanong ug misalmot sa gipahigayong march rally batok sa ginadiling drugas kaniadtong Biyernes. Ang march rally gipasiugdahan sa Movement Against Drugs o MAD ug kini gisuportahan sa atong kahugpongan nga nakigbatok sa ginadiling drugas.

Hinaut pa unta nga ang MAD nga giumol ni Sr. Supt. Melvin Buenafe, director sa kapolisan sa dakbayan sa Sugbo magpadayon ug dili lamang unta kini kutob sa publisidad.