Karong gipangunahan na sa usa ka pribadong institusyon ang pagpananom og kahoy sa tibuok lalawigan sa Sugbo, murag makasalig na ang tanan nga di mausik ang kahago sa mga tawong nananom niini.
Gawas sa kahago, labaw sa tanan ang salapi ug panahon nga gigahin alang sa pagpatubo sa mga lubangon gikan sa liso nga gipaturok niini ug sa gigamit nga plastik sa pagputos sa maong mga lubangon .
Ang Ramon Aboitiz Foundation Inc.(RAFI) nga maoy nagpasiugda ug gisuportahan sa kagamhanan pinaagi mismo nila ni Kongresista Eduardo Gullas sa unang distrito sa lalawigan sa Sugbo, Gobernador Gwen Garcia sa lalawigan sa Sugbo, Mayor Socrates Fernandez sa dakbayan sa Talisay nga maoy host sa ika-upat nga paglusad sa Greenin Philippines sa RAFI, ug ingon man sa taga DENR, makasalig ang tanan nga may klarong mga kahoy nga manubo sa mga dapit nga gitanoman ning higayona.
Kini tungod kay nagtuo ta nga una ilusad ang maong pagpananom, ang RAFI may giandam nang mga sistema sa pag-atiman aron motubo ang maong mga tanom sa dapit diin gipatud-an og singot sa mga tawong misalmot sa kalihokan sa usa ka maayong tumong.
Nagtuo ang tanan nga ang akto nga pagpananom sa mga mahalong klase sa kahoy, maoy katapusang bahin sa mga plano sa RAFI, sa dayon nang tisok sa mga lubangon sa yuta.
Kini tungod kay gituohan sa kadaghanan nga ang unang gihan-ay sa maong institusyon mao ang mga sistema kinsay mopatubo, unsaon pag-amuma ang maong mga tanom ug ang pagpalabong niini sa umaabot nga mga adlaw.
Aron nga usa ka adlaw niana, kutob sa nakasalmot sa pagpananom sa maong mga lubangon di hilabwan ang kalipay ug kamaya kun sa pipila ka tuig gikan karon inigbalik ngadto sa maong lugar, di na upaw nga bakilid ang imong makita kundi ang usa ka langsob ug bugnaw nga bahin sa bukid nga nahimong dangpanan sa mga langgam ug tinubdan sa katubigan sa ilawom nga bahin sa yuta niini. Di ba?