Dakila ang lahing Pinoy

Mga Pilipino ay dakilang lahi

Kaya sa daigdig tayo’y natatangi;

Sa mga labanang tayo’y katunggali

Laging nangunguna at di naaapi!

Sa mg labanang tayo ay kalahok

Itong buong lahi’y nakikipaghamok;

Laban sa Kastila tayo ay nabantog –

Kontra mga Kano tayo’y di natakot!

Lahing Pilipino’y likas na matapang

Ang diwa ni Rizal nanguna sa laban;

At si Bonifacio sa tabak na tangan

Itong Katipunan naging matagumpay!

Sa pamamahala mayron tayong Quezon

At ang Social Justice kanyang pinayabong;

Ngayong ang pangulo ay anak ni Ninoy

Sa kanyang diskarte bagsak ang korapsyon!

Sa bagong panahon isang Manny Pacquiao

Nagpakitang gilas – matapat lumaban;

Sa larangang sports ay kanyang nakamtan-

Paghanga ng mundo ating karangalan!

Dahil sa ang bansa’y maraming masipag

Sa ibayong dagat trabaho’y hinarap;

At doon man sila ay naging matapat

Mga bayani ring tinanghal na ganap!

Sapagka’t ang lahi’y may gintong layunin

Maging sa negosyo nangunguna pa rin;

Itong ating bansa’y maraming pagkain

Dahil magsasaka’y masipag magtanim!

Mga mangingisda’y hindi nagsasawa

Pumapalaot din kahi’t na may sigwa;

Laging uwi nila ay maraming isda –

Para sa pamilya at sa buong bansa!

Marami ang bansang sa ati’y naghangad

Na tayo’y agawan ng ating watawat;

Subali’t sa tagdan di nila natinag

Sapagka’t ang Pinoy sa tapang ay kidlat!