Pagbukas sa klase, nakita ug mibutho na usab ang walay kasulbaran nga problema sa kakulang sa mga classrooms, kakulang sa mga libro, kakulang sa mga magtutudlo, kakulang sa mga school buildings, kakulang sa mga lingkoranan, ug karong bag-o nabalita ang kakulang sa mga chalk, ug lagmit kulang sad ang eraser ug mga blackboard.
Unsay solusyon sa administrasyon ni Noynoy? Dungagan og duha ka tuig ang high school, ug ang sex education itudlo na sa elementarya, lagmit tudloan sila unsaon paggamit sa condom.
Daghan ug dagku ang mga suliran nga gisagubang karon sa atong nasud. Nagkadaku ug nagsige pa kita’g pangutang; pakyas ang agricultural production, hinungdan nga sige ang atong pagpamalit og bugas gikan sa mga nasud nga atong gitudloan unsaon pagpalambo sa rice production; hinay ang pagsulod sa foreign investments; paltos ang turismo itandi sa kasilinganan natong mga nasud dinhi sa Asia, bisan tuod og mga English speaking konohay ta.
Dili kasaligan ang atong military capability; wala masanta ang pagpamatay sa mga sakop sa media; nagkadaghan ang gigutom, ug misulbong ang gidaghanon sa mga walay trabaho; nagkamahal ang mga palitonon; sige ang smuggling; gisiaw kita sa issue sa Spratly; generally, wala pa maulii ang ekonomiya, kini ug daghan pang problema.
Taliwa niining tanan, daku ang atong katingala ngano nga maoy ilang unahon ang pagpamalit og condom ug mga contraceptives. Ambut ngano nga mao kini karon ang gihatagan og priority sa atong gobyerno, as if ang RH Bill maoy kasulbaran niining tanan. Busy kaayo ang atong Kongreso niini, sigeng debate.
Maayo man gani kay ang atong mga Kongresista dinhi sa lalawigan ug dakbayan sa Sugbo, supak sa RH Bill, gawas ni Rep. Tomas Osmeña, apan, matud niya, dili siya mobotar pabor niini, bisan og uyon siya niini, kay alang niya, walay urgency ang pagpapasar niini.
Ingonman, ang kadagkuan sa lalawigan ug mga dakbayan sa Sugbo, supak sa RH Bill, hulagway sa panaghiusa sa mga Sugbuanon batok sa RH Bill. Sa ako nang giingon, daghan kaayo tag problema, nganong mo-insister man ang Palasyo ug ang Kongreso nga urgent kaayo ang RH Bill?