Gihagoan g’yud nako pagsusi ang sapa-sapa nga milagbas ilawom sa Gaisano Main nga dia nagsubay sa kilid sa among building sa The Freeman.
Gitan-aw nako pag-ayo kun nganong dali ra kaayo nga misaka ang tubig-baha diri sa among lugar ug sa ubang bahin sa downtown area kaniadtong miaging Biyernes sa hapon.
Wala g’yud ko masayop. Sayunan ka samtang gitugotan sa City Hall nga ang Gaisano Main makatukod og building ibabaw sa sapa, apan pakyas sila pagpalawom niini sulod sa dugay na kaayong katuigan.
Duha na lang ka dangaw ang nahabilin ngadto sa sawog sa commercial building mao nga kun dunay baha, sigurado nga moawas ang tubig gikan sa sapa ngadto sa karsada.
Gawas pa, ang daplin nga bahin sa sapa dunay mga imbornal kon culvert nga maoy gawasanan sa tubig nga gikan sa drainage system sa karsada.
Apil kini nga maoy agian sa tubig gikan sa sapa ug inay nga ang tubig gikan sa drainage system mopaingon sa sapa, bali na ang mahitabo.
Kun suroyon lang g’yud unta ni Mayor Michael Rama ang mga estero ug kasapaan dinhi sa downtown, tingali makahuna-huna g’yud siya og paagi. Kinahanglan g’yud hinoon nga unahon ang pagpalawom sa sapa didto sa bukana nga bahin sa dagat nga dapit sa Pier III. Unya, ang pagpalawom himoon ngadto na sa unahan nga bahin lahus na sa dalan Legaspi.
Basi sa rekord sa City Hall mao kini ang gitawag og Parian Creek, tingali kay naa man kini mag-agi duol sa dalan Colon nga dili usab halayo sa Parian. Anhi dinhi moagos ang tubig gikan sa downtown area sama sa Manalili, Colon ug ubang kanait nga lugar. Apan ang pangutana kun ang gamay ug mabaw nga sapa makasapar pa ba sa tubig?
Tungod sa kamabaw na sa sapa, bisan og gamay lang kaayo ang uwan, maglunop dayon kay mosuyla man ang tubig ngadto sa karsada.
Siyaro og dili lang gihapon mangisog niini si Mayor Rama. Kun dili siya magtagad nga masulbad kining maong problema, sigurado ko nga daghang mga tawo ang maglagot kang Rama sa sunod eleksyon.
Bitaw, aksyoni na kining maong problema mayor!
* * *
Atensyon mga polis! Awhagon nako si “Major” Andres Bayarcal, ang hepe sa Waterfront Police Station nga destinohan nimo’g mga plain clothes policemen diri sa eskena V. Gullas ug D. Jakosalem. Nagsugod na nga dunay mga dautang elemento nga nag-operate diri. Nangreklamo ang mga drayber sa PUJ kay tulo ka tawo magbanus-banus sa pagpangilkil og kwarta kanila.
Ang akong kauban wala makaantos nga nagtan-aw, iya kining gibadlong kaniadtong Biyernes sa gabii. Espoko mo nga tanang mga sakyanan iyang pangayoan.
Pastilan, makurat tingali ang mga drayber mohatag usab dayon. Taud-taud, dunay duha ka lalaki nga miabut. Ang among gwardya sa The Freeman giingnan nga kun unsay ilang makit-an dili lang manghilabot.
Ang nakaapan lang niadtong maong mga tawo kay diritso nga misakay sa PUJ nga nangandam na man unta ang gwardya kun unsay sunod nga panghitabo.
Kamong mga tigas-tigas nga mosulod dinhi sa teritoryo sa The Freeman, palihug hugta daan ang inyong bakus kay dili ra ba g’yud ni malisang ang among mga gwardya.
Madakpan gani kamo sa inyong mga binuang diri, daghan nang mga kawat nga kami nabiktima, aw tan-awa lang unya.