Tinuod man nga ang misyon sa tawo mao ang paghigugma. Apan kining maong pagtin-aw halapad ra kaayo. Sa unsa mang paagi nimo matino nga kini mao ang imong misyon ug unsa man ang imong buhaton? Ania ang mga pipila ka mga sugyot:
a.) Ang pagpili sa imong buhat o trabaho. Adunay mga tawo nga dili malipayon sa ilang trabaho o panginabuhian bisan pa man kun duna sila’y mapaabot nga ginansiya o dako nga suweldo. Busa pangitaa ang trabaho nga naghatag kanimo og kalipay. Trabaho nga nakapahimo kanimong tinud-anay nga mabungahon.
b.) Ang pagbag-o sa imong kinaiya. Ang kinaiya usahay sa tawo ang apektado usab sa iyang siko-emosyonal nga kahimtang. Mamahimong init og ulo ang uban tungod kay wala sila mahimuot sa ilang nahimutangan. Wala sila matagbaw ug labaw na nga wala nila hikit-i ang kahulogan ug bulok sa ilang gibuhat.
c.) Ang pagbag-o sa atong pagkinabuhi. Usa ka paring dyosesano ang gipangutana kun nganong sa iyang nakab-ot nga titulo nga usa na ka monsenyor ang nihukom nga mag-ermitanyo. Siya mitubag: “Kini ang dugay ko na nga damgo. Akong nakita nga malipay ko ning maong matang sa pagkinabuhi.”
Dili mahimong dunganon nato ang tanan. Kinahanglan nga duna kita’y pilion sa daghan kaayong mga kapilian.